ސިނަމާލެ ބްރިޖުގެ ޓްރެފިކްލައިޓް ޖަންކްޝަންގައި، ޓްރެފިކް ބަލަހައްޓަން ހުރި ފުލުހެއްގެ ގައިގައި ކާރެއް ޖެއްސި މައްސަލައިގައި އެކާރު ދުއްވި ޑްރައވަރު ހައްޔަރުކޮށް މައްސަލަ ތަޙްޤީޤު ކުރަން ފަށައިފިއެވެ.

އިއްޔެ ހަވީރު ހިނގި މިހާދިސާގައި ފުލުސް މީހާގެ ގައިގައި ޖެހިފައި ވަނީ ޓެކްސީއަކުންނެެވެ. ޓެކްސީ ޑްރައިވަރު ގަސްތުގައި ފުލުސް މީހާގެ ގައިގައި ޖެއްސީކަމެއް ނުވަަތަ ޖެހުނީ ކަމެއް ސާފެއް ނޫނެވެ. ކާރުން ފުލުސް މީހާގެ ގައިގައި ޖެހި ވެއްޓުމާއި އެކު ކާރު ވަގުތުން ހުއްޓިއެވެ.

ފުލުހުންގެ ތަރުޖަމާނު އަޙްމަދު ޝިފާން ވިދާޅުވީ، އެމައްސަލައިގައި ޑްރައިވަރު ހައްޔަރުކޮށް، ތަހްޤީޤު ފަށާފައިވާ ކަމަށެވެ. އެހެން ނަމަވެސް އެމައްސަލައިގެ އިތުރު ތަފްސީލެއް އޭނާ ހާމައެއް ނުކުރައްވައެވެ.