އިނގިރޭސި ޕްރިމިއަ ލީގުގައި މުހިންމު ކުރިމަތިލުމަކަށް ވެގެން ދިޔަ މެންޗެސްޓަރ ސިޓީ އާއި އާސެނަލް ބައްދަލުކުރި މެޗުގައި، ލީގު ރޭހުގައި އެޑްވަންޓޭޖު ނެގުމަށް ދެ ޓީމުން ކުރި ބުރަ މަސައްކަތުން "ދެވަރުން އެއްވަރުވެ" ނަތީޖާއެއް ނުނެރެވި، 0-0 އިން އެއްވަރުވެގެން މެޗު ނިންމާލަން ޖެހިއްޖެއެވެ. އެހެންކަމުން، ޔާގެން ކްލޮޕަށް ރަގަޅު ފެއާވެލްއަކާއެކު ސީޒަން ނިންމާލުމަށް ތައްޔާރުވަމުންދާ ލިވަޕޫލުން މިވަނީ އެކަމުގެ ފައިދާ ނަގާފައެވެ.

ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗުގައި ދެ ޓީމުން ގޯލުޖަހާނެ ރަގަޅު ފުރުސަތުތައް ތަނަވަސްކޮށްފައި ވެއެވެ. މި ސްޓޭޑިއަމްގައި، އަދި އެއްވެސް ޓީމަކަށް މި ސީޒަނުގައި ސިޓީ ބަލިކުރެވިފައި ނުވިނަމަވެސް، މެޗަށް ނިކުތްއިރު އާސެނަލްއަށް އޮތް އެންމެ ބޮޑު ހިތްވަރަކީ، އެމިރޭޓްސްގައި މިދިޔަ އޮކްޓޯބަރު މަހު ދެ ޓީމު ބައްދަލުކުރި މެޗުގައި 1-0 އިން ސިޓީ ބަލިކޮށްފައިވުމެވެ. ނަމަވެސް އެންމެ ފަހުން ލީގުގައި ކުޅުނު 8 މެޗުން މޮޅުވެފައިވާ އާސެނަލްއަށް، މި މެޗުގައި ނަތީޖާއެއް ނެރެވޭ ގޮތެއް ނުވިއެވެ. 

މިއީ ލީގުގެ ކުރީގައި އުޅޭ ތިން ޓީމުން، އެއް ޓީމުން އަނެއް ޓީމަށް ސީދާ ރައްދު ދިނުމަށް މި ސީޒަންގައި ލިބުނު އެންމެ ފަހު ފުރުސަތެވެ. މި މެޗު ނިމިގެން މި ދިޔައީ ލިވަޕޫލުން އެންމެ ހިތްހަމަ ޖެހޭ ގޮތަށް، ސިޓީއާ އާސެނަލްގެ ކުރިމަތިލުމުން ކޮންމެ ޓީމަކަށް އެއް ޕޮއިންޓު ލިބިގެނެވެ. 

މި ނަތީޖާއާއެކީ ފާއިތުވި ހަ ސީޒަނުގެ ތެރެއިން ފަސް ސީޒަނުގައި ލީގުގެ ޗެމްޕިއަންކަން ހޯދާފައިވާ މެންސިޓީއަށް އާސެނަލް ފަހަތަށް ޖައްސާލުމަށްފަހު ލީގުގެ ދެވަނައަށް އެރުމަށް ލިބުނު ފުރުސަތު ވެސް މިވަނީ ބޭކާރުވެފައެވެ. އެހެންކަމުން، ލީގުގައި ބާކީ 9 މެޗު ކުޅެން އޮތްއިރު، ކޮންމެ މެޗަކީ ވެސް ލީގުގެ ރޭހަށް ބަދަލު އައިސްދާނެ މެޗެކެވެ.

ލީގުގެ އެއްވަނައިގައި އޮތް ލިވަޕޫލުން ބަރައިޓަންއާ ދެކޮޅަށް ކުޅުނު މެޗުގައި، ބްރައިޓަން ގޯލެއް ޖަހާފައި ވަނިކޮށް ފަހަތުން އަރާ 2-1 އިން ވަނީ މެޗު ކާމިޔާބުކޮށްފައެވެ. ބްރައިޓަންއިން ލީޑު ނެގީ ދެވަނަ މިނެޓުގައި ވެލްބެކް ޖަހައިދިން ގޯލަކުންނެވެ. ނަމަވެސް، ލުއިޒް ދިއާޒްއާ މުހައްމަދު ސަލާހްގެ ގޯލުތަކުން ލިވަޕޫލް ވަނީ މެޗުގެ ނަތީޖާ އަނބުރާލާފައެވެ.

އެހެންކަމުން ލީގު ތާވަލުގައި ލިވަޕޫލުން މިވަނީ މިހާރު ދެ ޕޮއިންޓުގެ ލީޑެއް ނަގާފައެވެ.