ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމަށް އެންމެ ހަތަރު މަސްވީއިރު، ރައްޔިތުން އެމަނިކުފާނުގެ ކުރިމައްޗަށް އަރައި ތިޔަހަދަނީ ދޮގުކަމުގައި ބުނަންފަށައިފި ކަމަށް، ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު އަދި އެދާއިރާއަށް އެމްޑީޕީގެ ޓިކެެޓްގައި ވާދަކުރައްވާ ކެންޑިޑޭޓް ޖީހާން މަހުމޫދު ވިދާޅުވެއްޖެއެވެ.

ޖީހާން މިހެން ވިދާޅުވީ، އެދާއިރާގެ ރައްޔިތުންނާއިއެކު މިރޭ ބޭއްވި ތަރާވީސް ފަރިއްކޮޅުގައި ބައިވެރިވެވަޑައިގެން ދެއްކެވި ވާހަކަފުޅުގައެވެ. މިބައްދަލުވުމުގައި ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙްވެސް ބައިވެރިވެވަޑައިގެންނެވިއެވެ.

ޖީހާން ވިދާޅުވީ، ރައީސުލްޖުމްހޫރިޔާ ކަމުގެ މަޤާމުގައި ރައީސް ޞާލިޙް 5 އަހަރުގެ ދައުރެއް ފުރިހަމަ ކުރެއްވި އިރު، އެމަނިކުފާނާއި ނުރުހިގެން ރައްޔިތުން އެއްޗެހި ނުބުނާކަމަށެވެ. އެހެން ނަމަވެސް މިއަދު ރައީސް ޑރ. މުޙައްމަދު މުޢިއްޒު ޑޯޓުޑޯއަށް ނުކުމެ އުޅުއްވަނިކޮށް، މެދު ހެންވޭރު ދާއިރާގެ ރައްޔިތުން ނުރުހުން ފާޅުކުރުން ފާހަގަކުރައްވަމުން ޖީހާން ވިދާޅުވީ، ރައީސް މުއިއްޒުގެ ވެރިކަމަށް އެންމެ ހަތަރު މަސްވީއިރު އެމަނިކުފާނުގެ ކުރިފުޅުމަތީގައި، ތިޔަ ހައްދަވަނީ ދޮގޭ ރައްޔިތުން ބުނަން ފަށައިފި ކަމަށެވެ. އެއީ މިއަދު ހާލަތު ފެންނަ ހަޤީޤަތެއްކަން ފާހަގަކުރައްވައި ޖީހާން ވަނީ އެއީ މިސްރާބު ހަމަމަގަން އަޅުވަންޖެހޭ ސަބަބު ކަމަށެވެ.

ޖީހާން ވަނީ، އެމްޑީޕީއަށް މެޖޯރިޓީ މުހިއްމުވާ ސަބަބުތައްވެސް ވިދާޅުވެދެއްވާފައެވެ. މިގޮތުން ސަރުކާރު ޖަވާބުދާރީ ކުރުވައި، މަޝްރޫޢުތައް ހިންގުމަށް ބާރުއެޅޭނީ، އެގޮތުން ކަމުގައި ޖީހާންގެ ވާހަކަފުޅުގައި ވަނީ ފާހަގަކުރައްވާފައެވެ.

ހޮނިހިރު ދުވަހު ރައީސް ޑރ. މުހައްމަދު މުޢިއްޒު މަޖިލިސް ކެމްޕޭނުގައި ހެންވޭރު މެދުދާއިރާގެ ޕީއެންސީ ކެންޑިޑޭޓާއި އެކު ޑޯޓުޑޯގައި ހިންގަވަނިކޮށް، އެދާއިރާގެ ރައްޔިތުންގެ ތެރެއިން ބަޔަކު ވަނީ ރައީސް ޑރ. މުއިއްޒާއި މަގުމަތިން ދިމާކޮށް ނުރުހުންފާޅުކޮށް އެމަނިކުފާނު އިތުރުފުޅު ހައްދަވާ ކަމުގައި ބުނެފައެވެ. އޭގެ ޖަވާބުގައި ރައީސް ޑރ. މުޢިއްޒު ވަނީ އެމަނިކުފާނުގެ މައްޗަށް ކުރައްވާ ތުހުމަތުތަކާއި އެމަނިކުފާނާއި ގުޅޭގޮތުން އެރައްޔިތުން ދެއްކެވި ވާހަކައަކީ ހުސްދޮގުކަމުގައި ވިދާޅުވެ އެރައްޔިތުންނަށް ޖަވާބު ދެއްވާފައެވެ.