ކުޑަ ކަމަކުން ވެސް ގިނަ ދަރުމަ ހޯދިދާނެ.

ފަނަރަވަނަ އެޕިސޯޑުގައި ޝެއިޙް އިލްޔާސް ޖަމާލް ވާހަކަފުޅު ދެއްކެވީ ހެޔޮކަންކަމަށް މަގުދެއްކުމާ ގުޅޭ ގޮތުން.

ކީރިތި ރަސޫލާ ޙަދީޘްކުރައްވަނީ;

مَن دَلَّ علَى خَيْرٍ فَلَهُ مِثْلُ أَجْرِ فَاعِلِهِ

މާނައީ: "ހެޔޮކަމަކަށް މަގުދެއްކި މީހާ ދަންނައެވެ! ފަހެ އޭނާއަށް އެ ހެޔޮކަމެއް ކުރި މީހާގެ އަޖުރު ވެއެވެ." 

ލޮބުވެތި މުސްލިމް އަޚުންނާ އުޚްތުން!

މި ޒަމާނުގައި މީ ކިހާ ފަސޭހަކަމެއްތޯ؟ ގިނަ މީހުންނަކީ މީސް މީޑިއާގެ ވަޞީލަތްތައް ބޭނުންކުރާ މީހުން. އެފަދަ ވަޞީލަތްތަކުން ޢިލްމު ފަތުރާނަމަ، ޝައްކެއްނެތް އެތައް ބަޔަކަށް ރަނގަޅު ގޮތް އެނގިގެންދާނެ. އަދި އެއާ އެއްގޮތަށް ގިނަ ބަޔަކު ޢަމަލުކުރާނެ. ނަތީޖާއެއްގެ ގޮތުން އެ ޢިލްމު ފެތުރުމުގައި ބައިވެރިވި ކޮންމެ މީހަކަށް އެއާ އެއްގޮތަށް ޢަމަލުކުރަމުންދާ މީހުންނަށް ލިބިގެންދާ ސަވާބާ ދަރުމަ ލިބިލިބި ހުންނާނެ. އެހެންކަމުން އަޅުގަނޑުމެންނަކީ މިކަމަށް ސަމާލުކަންދޭ ބަޔަކަށް ވަމާތޯ؟