ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި، ވާދަކުރައްވާ މެދުހެންވޭރު ދާއިރާގެ ޕީއެންސީ ކެންޑިޑޭޓުގެ ކެމްޕޭނުގައި ރައީސް ޑޯޓުޑޯއަށް ވަޑައިގެންނެވުމުން އެދާއިރާގެ ބައެއް ރައްޔިތުން ނުރުހުންފާޅުކޮށްފިއެވެ.

މަގުމަތިން ރައީސް ޑރ. މުޙައްމަދު މުޢިއްޒާއި ދިމާކޮށް، ނުރުހުންފާޅުކޮށްފައި ވަނީ، އަމިއްލަ ގޮތުން އެދާއިރާއަށް ވާދަކުރެއްވުމަށް ނިންމެވި، ހަސަން ޝިޔާމްއަށް ތާއީދުކުރާ އާއްމު ރައްޔިތުންގެ ތެރެއިން ބައެކެވެ. އެމީހުން ރައީސް ޑރ. މުޙައްމަދު މުޢިއްޒުގެ ކުރިފުޅުމަތީގައި ނުރުހުންފާޅުކޮށް ވަނީ ޝަކުވާކޮށްފައެވެ. ނުރުހުން ފާޅުކުރި މީހުން ބުނެފައި ވަނީ، ރިޔާސީ އިންތިޚާބުގައި ޑރ. މުޙައްމަދު މުއިއްޒަށް ދާއިރާ ކާމިޔާބު ކޮށްދިނުމަށް އެންމެ ބޮޑަށް މަސައްކަތް ކުރެއްވީ ޙަސަން ޝިޔާމް ކަމަށެވެ. އެހެން ނަމަވެސް ޝިޔާމް އާއި މެދު ރައީސް ކަންތައް ކުރައްވާފައި ވަނީ ގޯސްކޮށް ކަމުގައި ބުނެ މީހުން ވަނީ ޝަކުވާކޮށްފައެވެ.

އަދި ޕީޕީއެމް ޕީއެންސީގެ ޕްރައިމަރީގައިވެސް ހަސަން ޝިޔާމް ވަކިކޮށް، ކަންތައް ކޮށްފައިވަނީ ގޯސްކޮށްކަން އެމީހުން ފާހަގަކުރިއެވެ.

އެހެން ނަމަވެސް ރައީސް ޑރ. މުއިއްޒު އެމީހުންނަށް ވިދާޅުވީ، އެކަން ހިނގާދިޔަ ގޮތެއް އެމަނިކުފާނަށް އެނގިވަޑައިނުގަންނަވާ ކަމަށެވެ. އަދި އެމަނިކުފާނާއި ގުޅޭ ގޮތުން އެރައްޔިތުން ތުހުމަތުކުރެއްވި ކަންކަމަކީ ހުސްދޮގުކަމުގައި ވިދާޅުވެ ރައީސް ޑރ. މުއިއްޒު ވަނީ އެމީހުންނަށް ޖަވާބު ދެއްވާފައެވެ.

މެދު ހެންވޭރުގެ ރައްޔިތުންގެ ތެރެއިން ބަޔަކު ރައީސްގެ ކުރިފުޅުމަތީގައި ނުރުހުންފާޅުކޮށް ވާހަކަދެއްކި މަންޒަރުތަކުގެ ވީޑިއޯ ސޯޝަލްމީޑިއާގައި ވަނީ ވައިރަލްވެފައެވެ.

އަމިއްލަގޮތުން އެދާއިރާގެ ގޮނޑިއަށް ވާދަކުރަން ނިންމެވި ޙަސަން ޝިޔާމްގެ ސާބިތު ދަރަންޏެއް އޮތްކަމަށް ބުނެ އަމިއްލަ ފަރާތަކުން ދިވެހިރާއްޖޭގެ ސްޕްރީމްކޯޓަށް ހުށައެޅި މައްސަލައިގައި އެކޯޓުން ވަނީ ޝިޔާމްގެ ކެންޑިޑެންސީ ބާޠިލްކޮށްފައެވެ.