މިސަރުކާރު ވެރިކަމަށް އައީވެސް ދޮގު ވާހަކަތައް ދައްކައިގެން ކަމަށާއި، އެދޮގުތައް ފޮރުވުމަށް ސަރުކާރުން ދަނީ ރައްޔިތުންނަށް އޮޅުވާލައި އިތުރު ދޮގުތައް ހަދަމުން ކަމުގައި ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމްޑީޕީގެ ޓިކެޓްގައި ހުޅުމާލޭގެ ދާއިރާތަކަށް ވާދަކުރައްވާ ކެންޑިޑޭޓުންނަށް ތާއީދު ހޯއްދެވުމަށް ރޭ ބޭއްވި ކެމްޕޭން ޖަލްސާގައި ވާހަކަފުޅު ދައްކަވަމުންނެވެ.

ރައީސް ޞާލިޙް ވިދާޅުވީ، މިސަރުކާރު ހަމަ މަގަށް އެޅުވުމަށްޓަކައި، މިއަދު ކުރެވެން އޮތް އެންމެ މުހިއްމު ކަމަކީ ރައްޔިތުންގެ މަޖިލީހުގެ މެޖޯރިޓީ ހޯދުން ކަމަށެވެ. 

ރައީސް ޞާލިޙްގެ ވާހަކަފުޅުގައި ވިދާޅުވީ، ވެރިކަމަށް ވަޑައިގެންނެވުމަށް މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައްދަވަމުން ގެންދެވި ދޮގުތަކުގެ ތެރޭގައި، އެްކަމަކަށް ދެއްކެވި އެއް ވާަހަކައަކީ، މުޅި ރާއްޖޭގައި ހަތިޔާރު އެޅި ގިނަ އަދަދެއްގެ ބޭރުގެ ސިފައިން އުޅޭ ކަމުގެ ވާހަކަ ކަމަށެވެ. މިގޮތުން އެއަދަދު ހާހުން ދެހާހުން ގުނޭ ކަމުގައި ރައީސް ޑރ. މުޙައްމަދު މުޢިއްޒު ވިދާޅުވި ކަންވެސް ރައީސް ޞާލިޙް ފާހަގަކުރެއްވިއެވެ.

ރައީސް ޞާލިޙް ވިދާޅުވީ، ރިޔާސީ އިންތިޚާބުގެ ކެމްޕޭނުގެ ތެރޭގަިއ އެމްޑީޕީއާ އިދިކޮޅު ކެންޑިޑޭޓުން ރަށްރަށުގައި ހިނގައި ނޫޅެވޭ ވަރަށް އެރަށްރަށުގައި ބޭރުގެ ސިފައިން ތިބި ކަމުގެ ވާހަކަތައް ދައްކާފައިވާ ކަމަށެވެ. 

ރައީސް ޞާލިޙްގެ ވާހަކަފުޅުގައި، އުތުރު ތިލަފަޅާއި ގުޅުވައިގެން މިހާރުގެ ސަރުކާރާއި މިހާރުގެ ސަރުކާރަށް ވާގިވެރިވި ފަރާތްތަކުން ފެތުރި ދޮގު ވާހަކަތަކުގެ މައްޗަށްވެސް އަލިއަޅުއްވައިލެއްވިއެވެ.

މީގެ އިތުރުން ރައީސް ޞާލިޙް ވަނީ މިސަރުކާރުން ފެށީ ފުށި ދިއްގަރުފަޅުގައި ރަސްމާލެ ތަރައްޤީ ކުރުމުގެ މަޝްރޫޢާ ގުޅޭ ގޮތުންވެސް ވާހަކަފުޅު ދައްކަވާފައެވެ.