މި ރަމަޟާން މަހުގެ ފުރަތަމަ 10 ދުވަހުގައި ފިޠުރު ޒަކާތުގެ ގޮތުގައި، އާއްމުން 1.6 މިލިއަން ރުފިޔާ ދައްކާފައިވާ ކަމުގައި މޯލްޑިވްސް ޒަކާތު ހައުސްއިން ހާމަކޮށްފިއެވެ.

މޯލްޑިވުސް ޒަކާތު ހައުސްއިން ހާމަކޮށްފައިވާ ގޮތުގައި، ރަމަޟާން މަހުގެ ފުރަތަމަ 10 ދުވަހު ފިތުރު ޒަކާތުގެ ގޮތުގައި، 1،599،113ރ (އެއްމިލިޔަން ފަސްލައްކަ ނުވަދިހަނުވަހާސް އެއްސަތޭކަ ތޭރަ ރުފިޔާ) ވަނީ ދައްކާފައެވެ. މިގޮތުން އެހާތަނަށް، 38،681 މީހުން ވަނީ ފިޠުރު ޒަކާތް ދައްކާފައެވެ. އަދި ތަފާސް ހިސާބުން ހާމަވާ ގޮތުގައި އެންމެ ގިނަ މީހުން ފިޠުރުޒަކާތް ދައްކާފައި ވަނީ އާދައިގެ ހަނޑުލުގެ އަގުންނެވެ. މިގޮތުން، 22،759 މީހަކު، އާދައިގެ ހަނޑުލުން ޒަކާތް ދައްކާފައި ވެއެވެ. ދެވަނައަށް އެންމެ ގިނަ މީހުން ޒަކާތް ދައްކާފައި ވަނީ ބާސްމަތީ އާދައިގެ ހަނޑުލުންނެވެ. އެއީ 5208 މީހުންނެވެ.

މިނިސްޓްރީ އޮފް އިސްލާމިކް އެފެއާޒުން ހާމަކުރައްވާފައިވާ ގޮތުގައި، އާދީއްތަ ދުވަހުން ފެށިގެން، އިސްލާމީ މަރުކަޒުގެ ހޯލުގައި ޒަކާތް ބަލައިގަންނާނީ ހުކުރު ހޮނިހިރު ފިޔަވާ ކޮންމެ ދުވަހެއްގެ ހެނދުނު 11:00 އިން މެންދުރު ފަހު 2:00 އަށެވެ. ގޮވާމުން ޒަކާތް ބަލައިގަންނާނީ އާދިއްތަ ދުވަހުން ފެށިގެން އޭޕްރީލް 8ގެ ނިޔަލަށް ހުކުރު އަދި ހޮނިހިރު ފިޔަވާ ކޮންމެ ދުވަހެއްގެ މެންދުރުފަހު 1:00 އިން ހަވީރު 4:00 އަށެވެ.

ޢިލްމުވެރިން ވިދާޅުވާ ގޮތުގައި ފިޠުރު ޒަކާތަކީ، އީދު ދުވަހާއި އެރޭ ތިމާ އާއި ތިމާގެ އަނބިދަރިން ކެއިން ބުއިމަށް ބޭނުންވާ މިންވަރަށް ވުރެ އިތުރަށް އަތުގައި ހުރެއްޖެ ކޮންމެ މުސްލިމެއްގެ މައްޗަށް ވާޖިބުވެގެންވާ ޒަކާތެވެ. މިގޮތުން ރަމަޟާން މަހުގެ ފަހު ދުވަހު އުފަންވާ ކުއްޖާގެ މަތިންވެސް ފިޠުރުޒަކާތް ނެރުން ވާޖިބުވާނެއެވެ. 

ރާއްޖޭގެ އާބާދީ މިހާރު ހުރީ ބައި މިލިޔަނުގައެވެ.