ހުޅުމާލެ ފޭސް 2ގައި އަޅާ ޕެޓް ކެއަރ ފެސިލިޓީގެ ބިންގާ އަޅައިފިއެވެ.

މިފެސިލިޓީގެ ބިންގާ އަޅުއްވައި ދެއްވީ، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދާއި، މާލޭ ސިޓީގެ މޭޔަރު އާދަމް އާޒިމެވެ.

މި ފެސިލިޓީގެ ބިންގާ އެޅުމަށް ބޭއްވި ރަސްމިއްޔާތު އޮތީ، ބުރާސްފަތި ދުވަހުގެ ހަވީރު ހުޅުމާލެ ފޭސް 2 ގައި، ޕެޓް ކެއަރ ފެސިލިޓީ އެޅުމަށް ހަމަޖައްސާފައިވާ ބިމުގައެވެ.

ސަރުކާރުން އަޅާ މި ފެސިލިޓީއަކީ މާލެ ސަރަހައްދުގެ ޕާކުތަކާއި މަގުމަތީގައާއި އަދި މި ނޫންވެސް ޢާންމުން އެއްވެ އުޅޭ ސަރަހައްދުތަކުގައި ބުޅާ ގިނަވެ، އެ ބުޅާތަކަށް ލިބެމުންދާ އަނިޔާތަކާއި އަދި ތަފާތު ބަލިތައް ޖެހުމުން ސަލާމަތްކޮށް، ބުޅާތައް ދިރިއުޅޭނެ ރައްކާތެރި މާހައުލެއް ޤާއިމުކުރުމަށާއި އާންމު ތަންތަނުގައި ބުޅާ ގިނަވުމުގެ ސަބަބުން ފެތުރިދާނެ ބަލިތަކުން އާންމު ސިއްޙަތު ރައްކާތެރި ކުރުމުގެ ބޭނުމުގައި ޤާއިމުކުރާ ފެސިލިޓީއެކެވެ.

މި ފެސިލިޓީގައި ބުޅާތައް ކަރަންޓީނު ކުރާނޭ ސަރަޙައްދަކާއި، ކްލިނިކަކާއި، ފާމަސީއާއި، ލެބޯޓްރީ އަދި ހިޔާވަހިކަމާއި، އެކަށީގެންވާ ޞިއްޙީ ފަރުވާ އަދި ކުޅޭ ސަރަހައްދު ފަދަ ތަފާތު ޚިދުމަތްތައް އެއްފުރާޅެއްގެ ދަށުން ލިބިގެން ހުންނާނެ ކަމުގައި ސަރުކާރުން ހާމަކޮށްފައިވެއެވެ. މީގެ އިތުރުން ގޭގައި ގެންގުޅޭ ބުޅާތަކަށްވެސް ފެންވަރު ރަނގަޅު ޞިއްޙީ ފަރުވާ މި ފެސިލިޓީން ލިބިގެންދާނެކަމުގައި ސަރުކާރުން ވަނީ ހާމަކޮށްފައެވެ.

އަދި މި ފެސިލިޓީ ޤާއިމުކުރުމުން މާލެ ސަރަހައްދުގައި ބުޅާތައް ގިނަވެފައި ވުމުން ކުރިމަތިވާ މައްސަލަތަކަށް ދާއިމީ ހައްލެއް ލިބިގެންދާނެކަމުގައިވެސް ސަރުކާރުން ވަނީ ބުނެފައެވެ.

މާލެ ސަރަހައްދުގައި ޕެޓް ކެއާ ފެސިލިޓީއެއް ޤާއިމްކުރެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމަނިކުފާނުގެ ރިޔާސީ ކެޕްމޭނުގެ ތެރޭގައިވެސް ވެވަޑައިގެންނެވި ވަޢުދުފުޅެކެވެ.