ވެރިކަމުގެ ފުރަތަމަ 4 މަސް ނިމިގެން މިދިޔައީ، ޖުމުލަ ގޮތެއްގައި ވަރަށް ރަނގަޅަށް ކަމުގައި، ރައީސުލްޖުމްހޫރިއްުޔާ، ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ދައުލަތުގެ މީޑިއާ ޕީއެސްއެމްގެ ޕީއެސްއެމް ނިއުސްއަށްދެއްވި ޚާއްޞަ ބަސްދީ ގަތުމުގައެވެ. 45 މިނިޓްގެ މިބަސްދީ ގަތުމުގައި ސަރުކާރުގެ ސިޔާސަތުތަކާއި ގުޅޭ ގޮތުންނާއި ކުރިޔަށް ރާއްވަވާ ކަންކަމާއި ގުޅޭ ގޮތުންވެސް ރައީސުލްޖުމްހޫރިއްޔާގެ ވާހަކަފުޅުގައި އަލިއަޅުއްވާލެއްވިއެވެ.

މިވެރިކަމުގެ ފުރަތަމަ ހަތަރު މަސް ދުވަސް މިވޭތުވެ ދިޔައީ ޖުމުލަ ގޮތެއްގައި ވަރަށް ރަނގަޅަށް ކަމުގައި ފާަހަގަކުރެއްވުމަށްފަހުގައިވެސް ރައީސުލްޖުމްހޫރިއްޔާ ވިދާޅުވީ، ވެރިކަމާއި ހަވާލުވެ ވަޑައިގެންނެވި އިރު ޤައުމުގެ އިޤުތިޞާދު އޮތީ ފުންވަޅުގަނޑެއްގައި ކަމަށެވެ. މިގޮތުން ރާއްޖޭގެ ދަރަންޏާއި މެދު އެމަނިކުފާނު ދައްކަވާ ވާހަކަފުޅު މިބަސްދީގަތުމުގައިވެސް އެމަނިކުފާނު ތަކުރާރު ކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ، ފައިސާ ޗާޕުކުރުމުގެ ސަބަބުން ދިވެހި ފައިސާގެ އަގު ވެއްޓި ޑޮލަރުގެ އަގު ވިހިރުފިޔާއާ ހަމަަކަށް ދިޔަކަމުގައި ހީފުޅުވި ކަމަށެވެ. އެހެންވެ އިޤުތިޞާދު ހީނަރުވެ ކުދި ވިޔަފާރިތައްވެސް އޮތީ ގާތްގަނޑަކަށް ހުއްޓުމަކާއި ހަމައަށް ގޮސްފައި ކަމުގައި އެމަނިކުފާނު ވިދާޅުވިއެވެ. އެހެން ނަމަވެސް މި ހަތަރު މަސްދުވަހުގެ ތެރޭގައި އިޤުތިޞާދީ ގޮތުން ރަނގަޅު ނަތީޖާތަކެއް ހޯދެމުން އަންނަ ކަމުގައި ރައީސް ޑރ. މުއިއްޒު ވިދާޅުވިއެވެ.

ރައީސް ޑރ މުއިއްޒު ވިދާޅުވީ، އިޤުތިޞާދީ ފިޔަވަޅުތަކުގެ ސަބަބުން ރަނގަޅު ނަތީޖާތަކެއް ފެންނަމުން އެބަދާކަމަށެވެ. އަދި އިންވެސްޓް ކުރާނެ ފަރާތްތައް އެބަލިބޭ ކަމަށާއި މިހާރު އިންވެސްޓް ކުރާނެ ފަރާތްތައް ގިނަ ކަމަށާއި، ޓޫރިޒަމާއި އެހެނިހެން ދާއިރާތަކުންވެސް ވަރަށް ގިނަ ހުށައެޅުންތައް ލިބެމުން އަންނަ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން މިސަރުކާރުގެ ފުރަތަމަ ހަމަސްދުވަހުގެ ތެރޭގައި ކުރެވިފައިވާ މުހިއްމު މަސައްކަތްތައް ފާހަގަކުރައްވައި، ރައީސް ޑރ. މުއިއްޒު ވިދާޅުވީ، މިހަތަރު މަސްދުވަހުގެ ތެރޭގައި ކުރެއްވުނު މަސައްކަތްތަކާއި މެދު އެމަނިކުފާނު ހިތްޕުޅުހަމަޖެހިވަޑައިގަންނަވާކަމަށެވެ.