މާލެ، ހުޅުލެ އަދި ހުޅުމާލެ ކަރަންޓުގެ އެއްވިއުގައަކުން ގުޅާލުމަށް ޤާއިމްކޮށްފައިވާ ގްރޭޓަރމާލެ އިންޓަކަނެކްޝަން ގްރިޑްގައި ހިމެނޭ ކޭބަލް ވިއުގައިގެ މައްޗަށް ދަގަނޑު ޖަހައި އިސްތިހާރު ބޯޑުތައް ބެެހެއްޓުން ހުއްޓައި ނުލައި ކުރިޔަށް ގެންދާތީ، އެ ގްރިޑަށް ގެއްލުން ލިބިދާނެ އަމަލުތައް ނުކުރުމަށް އަނެއްކާވެސް ސްޓެލްކޯގެ އެމްޑީ ހުސައިން ފަޙްމީ އިލްތިމާސްކުރައްވައިފިއެވެ.

އެކްސްގައި ފަޙުމީ ކުރެއްވި ޕޯސްޓްގައި ވިދާޅުވީ، މާލެ، ހުޅުލެ އަދި ހުޅުމާލެ ކަރަންޓުގެ އެއްވިއުގައަކުން ގުޅާލުމަށް ޤާއިމްކޮށްފައިވާ ގްރޭޓަރމާލެ އިންޓަކަނެކްޝަން ގްރިޑްގައި ހިމެނޭ ކޭބަލް ވިއުގައިގެ މައްޗަށް ދަގަނޑު ޖަހައި އިސްތިހާރު ބޯޑުތައް އަދިވެސް ބަހައްޓަމުން ގެންދިއުމާއި މިވަގުތު ޖަހާފައިވާ ބޯޑުތައްވެސް އެ ކޭބަލް ވިއުގައިގެ މަތީގައި ހުރުމަކީ ވަރަށް ބޮޑަށް ކަންބޮޑުވެވަޑައިގަންނަވާ ކަމެއް ކަމަށެވެ. އަދި އެ ކޭބަލް ވިއުގައިގައި ހިމެނޭ ކޭބަލްތަކަށް ގެއްލުމެއްވެއްޖެނަމަ، އެ މަރާމާތު ކުރުމަށް ގިނަ ދުވަސްތަކެއް ނަގާނެ ކަމަށާއި، އަދި އެފަދަ ޙާލަތެއް މެދުވެރިވެއްޖެ ނަމަ، ސްޓެލްކޯއިން މާލެ އަދި ހުޅުމާލެއަށް ދެމުންގެންދާ ކަރަންޓުގެ ޚިދުމަތް އެންމެ ފުރިހަމަ ގޮތުގައި ދިނުމަށް ބޮޑެތި ގޮންޖެހުންތަކާއި ކުރިމަތިލާންޖެހޭނެކަމުގައިވެސް ފަޙްމީ ވިދާޅުވިއެވެ.

ފަހުމީ ވަނީ، އިސްތިހާރު ބޯޑުތައް ޖެހުމުގެ ހުއްދަ ދެއްވާ ފަރާތްތަކުން އެކަމަށް އިތުރަށް ސަމާލުވެ، މިކަންކަން ބައްލަވައި ކޭބަލް ވިއުގަ ރައްކާތެރިކޮށް ބޭއްވުމަށް ކުރެވެން ހުރި ހުރިހާ މަސައްކަތެއް ކޮށްދެއްވުމަށްވެސް އިލްތިމާސް ކުރައްވާފައެވެ.

މިމަހުގެ 24 ވަނަ ދުވަހުވެސް ސްޓެލްކޯއިން ވަނީ ގްރޭޓަރމާލެ އިންޓަކަނެކްޝަން ގްރިޑަށް ގެއްލުން ލިބިދާނެ އަމަލުތައް ނުކުރުމަށް އިލްތިމާސްކޮށް އެކަމުގެ ކަންބޮޑުވުން ފާޅުކޮށްފައެވެ. އެކަމާއި ގުޅޭ ގޮތުން އެދުވަހު ސްޓެލްކޯއިން ނެރުނު ބަޔާނުގައި ވަނީ، އެފަދަ އަމަލެއްގެ ސަބަބުން، ގެއްލުމެއް ލިބިއްޖެ ނަމަ، އެކަމުގެ ޒިންމާވާ ފަރާތްތަކަށް ދަޢުވާކޮށް، އެކަމުގެ ސަބަބުން ލިބޭ މާލީ ގެއްލުމުގެ ބަދަލު ހޯދުމަށް ކުރަންޖެހޭ ހުރިހާ މަސައްކަތެއް ކުރާނެކަމަށެވެ. 

އެހެން ނަމަވެސް ސްޓެލްކޯގެ އިންޒާރަށް ބެލުމެއް ނެތި އަދިވެސް މަޖިލިސް އިންތިޚާބުގައި ވާދަކުރާ ކެންޑިޑޭޓުންގެ ޕޯސްޓަރުތަކާއި ބިލްބޯޑުތައް، ގްރޭޓަރމާލެ އިންޓަކަނެކްޝަން ގްރިޑްގައި ހިމެނޭ ކޭބަލް ވިއުގައިގެ މައްޗަށް ދަގަނޑުޖަހައިގެން ދަނީ ހަރުކުރަމުންނެވެ.