ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އިން ބީހައިވް ހޮޓަލުން ހޯދާފައިވާ ހިދުމަތްތަކަށް ފައިސާ ނުދައްކައިގެން، އެ ހޮޓެލް ނިސްބަތްވާ ކުންފުނިން ކުރި ދައުވާއަކަށް ބިނާކޮށް، އެފްއޭއެމްގެ މައްޗަށް ބޮޑު ދަރަންޏެއް ދެއްކުމަށް ސިވިލް ކޯޓުން ބުރާސްފަތި ދުވަހު ހުކުމްކޮށްފިއެވެ.

ބީހައިވް ހޮޓެލްސް ކުންފުނިން ކުރި ދައުވާއާ ގުޅިގެން، ސިވިލް ކޯޓުން ކުރި ހުކުމުގައި ބުނެފައި ވަނީ، އެފްއޭއެމްއިން އެ ކުންފުންޏަށް ދޭންޖެހޭ ކަމަށް ބުނާ 102،186 ޔޫއެސް ޑޮލަރަކީ (1.6 މިލިއަން ރުފިޔާ) އެފްއޭއެމްއިން ދައްކަންޖެހޭކަމަށް ސާބިތުވާ ދަރަންޏެއް ކަމަށެވެ. އެހެންކަމުން، ބުރާސްފަތި ދުވަހުން ފެށިގެން އެއް އަހަރުގެ މުއްދަތެއްގެ ތެރޭގައި އެ ފައިސާ ދައްކަންޖެހޭނެކަމަށް ހުކުމުގައި ބުނެފައި ވެއެވެ. 

މީގެ އިތުރުން، މި ފައިސާ ނުލިބި ހިނގާ ކޮންމެ ދުވަހަކަށް ގެއްލުމުގެ ގޮތުގައި %2 ގެ ފައިސާ އެއްފަހަރާ ދެއްކުމަށް ވެސް ބީހައިވް ހޮޓެލްސް ކުންފުނިން އެދިފައި ވެއެވެ. ނަމަވެސް ސިވިލް ކޯޓުން ކުރި ހުކުމުގައި ބަދަލު ނަގައިދިނުމުގެ ވާހަކަ ހިމަނާފައެއް ނުވެއެވެ. 

Advertisement

ހުކުމުގައި ބަޔާންކޮށްފައިވާ ގޮތަށް އެފްއޭއެމްގެ މައްޗަށް ސާބިތުވާ ދަރަންޏަކީ އެ އިދާރާއިން ދައްކަންޖެހޭ ފައިސާއެއްކަމަށް އެއްބަސްވި ނަމަވެސް، ބަދަލުގެ ގޮތުގައި އެ ބުނާ އިންސައްތަ ދޭންޖެހޭނެ ކަމަކަށް އެ އިދާރައެއް އެއްބަހެއް ނުވެއެވެ. މިކަމުގެ ސަބަބަކީ، އެ މިންވަރަކީ ދުވާލެއްގެ މައްޗަށް ބޮޑު އަދަދެއް ކަމުގައިވުމާއި، %2 ގެ ގެއްލުމެއް އެ ކުންފުންޏަށް ވާނެ ގޮތެއް ބަޔާންކޮށްފައި ނުވުމެވެ.