އެމްޑީޕީގެ ޗެއާ ޕާރސަން އަދި ކުރީގެ އިކޮނޮމިކް މިނިސްޓަރ ފައްޔާޒް އިސްމާއީލް، މިއަދު ފުލުސް އޮފީހަށް ހާޒިރުކުރީ ޖިނާއީ ކުށެއްގެ ތުހުމަތުގައި ނޫންކަމަށާއި މައުލޫމާތު ސާފުކުރަންކަމުގައި ފުލުހުން ވިދާޅުވެފައިވާ ކަމުގައި އެމަނިކުފާނު ވިދާޅުވެއްޖެއެވެ.

ފައްްޔާޒު ވިދާޅުވީ، ފުލުހުން ސާފުކުރަން ބޭނުން ވި މައުލޫމާތަކީ، އެމަނިކުފާނުގެ އޮޑިޓް ރިޕޯޓުތަކުގައި ހާމަކުރެވި، އާންމުވެސް ކުރެވިފައިވާ މައުލޫމާތުތަކެއް ކަމުގައި ވިދާޅުވެފައި ވާނެ ކަމަށާއި،  މި ތަހުގީގު ހިންގުމުގައި ސަރުކާރުގެ ބޭނުމަކީ އެމަނިކުފާނަށް، އަނިޔާވެރިވާ މަންޒަރު ދައްކައިގެން އެކަމުން ދިވެހި ރައްޔިތުންގެ ހިތްތަކުގައި ބިރުވެރިކަން އުފެއްދުންކަމުގައިވެސް ފައްޔާޒު ވިދާޅުވިއެވެ.

ފައްޔާޒު ވިދާޅުވީ، ސިޔާސީ ބޭނުމަށް ފުލުހުންގެ އިދާރާ ބޭނުންކުރުމަކީ ފުލުހުންގެ އާންމު ވާޖިބު އަދާކުރުމަށް ހުރަސް އެޅޭނޭ ކަމެއްކަމަށާއި، އެފަދަ ނޭނގާނީ ކަންކަން ހުއްޓާލުމަށް އިލްތިމާސްކުރައްވާ ކަމަށެވެ.

ފައްޔާޒު ވިދާޅުވީ، ވޭތުވެ ދިޔަ ފަސްއަހަރު އެމްޑީޕީގެ ސަރުކާރުން ކުރަމުން ދިޔަ މަސައްކަތަކީ، ފުލުހުންގެ އިދާރާއަކީ، ޕްރޮފެޝަނަލް ސްޓޭންޑަރޑްއެއްގައި ޒަމާނާއި ގުޅޭ ގޮތަށް ހިނގާތަނެއްގެ ގޮތުގައި ހެދުން ކަމަށެވެ. އަދި އެކަމަށް ވަރަށް ގިނަ މަސައްކަތްތަކަކާއި، ވަރަށް ގިނަ ޚަރަދުތަކެއް ކުރެވުނު ކަމަށާއި، އެހެންނަމަވެސް މިއަދު މިފެންނަނީ އެމްޑީޕީން ވެރިކަމާއި ދުރުވިތާ، ހަތަރުމަސް ވީއިރުގައި، އެކަން ސޮއްސާލައިގެން ގޮސް ސިޔާސީ މަޤުޞަދުތައް ހާސިލްކުރުމަށްޓަކައި ފުލުހުންގެ މުއައްސަސާ ބޭނުންކުރާ މަންޒަރު ކަމުގައިވެސް ފައްޔާޒު ވިދާޅުވިއެވެ.

އަދި އެކަމަކީ މަޖިލިސް އިންތިޚާބާއި ދިމާކޮށް ބިރުވެރިކަން އުފެއްދުމަށް ކުރާ މަސައްކަތެއް ކަމުގައި ވެސް ފައްޔާޒު ވިދާޅުވިއެވެ. 

އާރްޑީސީގެ ޚިޔާނާތާއި ގުޅޭ ގޮތުން ފުލުހުން ހިންގާ ތަހްޤީޤަށް ފައްޔާޒް އިސްމާއީލް ފުލުހުންގެ އިދާރާއަށް ހާޟިރުކޮށްފައި ވަނީ، މިއަދުގެ 15:00އަށެވެ. ފައްޔާޒުގެ ވަކީލެއްގެ ގޮތުގައި ވަޑައިގެންނެވީ މަޝްހޫރު ޤާނޫނީ ވަކީލު މަހްފޫޒް ސަޢީދެވެ.