ރަމަޟާން މަހުގެ ފަހު ދިހައިގެ ދުވަސްތައް ސަރުކާރު ބަންދު ދުވސްތަކެއްގެ ގޮތުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ ވަޢުދުފުޅާއި އެއްގޮތަށް ހަމަޖެއްސެވުމާއި ގުޅިގެން ސަރުކާރު މުވައްޒަފުންނަށް ލިބޭ ބޮޑު ޗުއްޓީ ފެށިއްޖެއެވެ. މިގޮތުން މިއަދު ރަސްމީ ގަޑި ނިމުމަށްފަހުގައި، ދެން ސަރުކާރުގެ އޮފީސްތައް ރަސްމީކޮށް ހުޅުވާނީ، އަންނަ އޭޕްރީލް މަހުގެ 14ވާ އާދީއްތަ ދުވަހުގައެވެ. އެހެން ނަމަވެސް، ސަރުކާރު ބަންދުވާ މި 16 ދުވަހުގައި، ސަރުކާރުގެ އިދާރާތަކާއި އޮފީސްތަކުން ކޮންމެހެން ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ފޯރުކޮށްދެއްވުމުގައި، އިންތިޒާމްތައް ހަމަޖެއްސެވުމަށް ރައީސުލްޖުމްހޫރިއްޔާ އަންގަވާފައެވެ.

ސަރުކާރު މުވައްޒަފުންނަށް މާދަމާ ޗުއްޓީ ފެށޭއިރު ކުރިޔަށް އޮތް ދެހަފްތާ ސްކޫލުތައް ވެސް ބަންދުވާނެއެވެ. މިގޮތުން މާރިޗު 29 އިން އޭޕްރީލް 13އަށް އޮންނާނީ ސްކޫލްތަކުގެ މިޑްޓަރމް ބްރޭކެވެ. އެހެންވެ ސްކޫލުތަކުގެ ކިޔެވުންވެސް ރަސްމީކޮށް ދެންފެށޭނީ އޭޕްރީލް 14ވާ އާދީއްތަ ދުވަހުންފެށިގެންނެވެ. އެހެން ނަމަވެސް، އެސްއެސްސީ އިމްތިޙާނާއި އައިޖީއެސްސީ އަދި ޖީސީއީ އޯލެވެލް އިމްތިހާނު އޭޕްރީލް މަހުގައި އޮންނާތީ، ގްރޭޑް 10ގެ ދަރިވަރުންގެ އެކްސްޓްރާ ކްލާސްތައް ސްކޫލުތަކުގައި ކުރިޔަށް ގެންދާނެއެވެ. އެހެންވެ ސަރުކާރު ބަންދުވި ނަމަވެސް ސްކޫލުތަކުގައި މަސައްކަތް ކުރައްވާ ބައެއް ގްރޭޑްތަކުގެ ޓީޗަރުން ސްކޫލުތަކަށް ނުކުންނަން ޖެހޭނެއެވެ.

ސަރުކާރު މުވައްޒަފުންނާއި ސްކޫލު ކުދިންނަށް މާދަމާއިން ފެށިގެން ދެހަފްތާގެ ޗުއްޓީއެއް ލިބޭއިރު، ދެން ޖެހިގެން އަންނަ މެއި މަހު 1އިން 23އަށް ތިންހަފްތާ ސްކޫލު ބޮޑު ޗުއްޓީގެ ގޮތުގައި ސްކޫލު ކުދިންނަށް ލިބޭނެއެވެ. 

Advertisement

މާދަމާފެށޭ ސަރުކާރުގެ ބޮޑު ބަންދަށް ފަހުގައި، އޭޕްރީލް 14ގައި ސަރުކާރު އޮފީސްތަކާއި، ސްކޫލުތައް ހުޅުވޭއިރު، އޭޕްރީލް 16 ފެށިގެން ސްކޫލުތަކުގައި ކުރިޔަށްދާނީ، ދެވަނަ ޓަރމްގެ ޓެސްޓެވެ.