ރައްޔިތުންގެ މަޖިލީހުގެ އިންތިޚާބުގައި ސަރުކާރުގެ ކެންޑިޑޭޓުން ނުހޮވަންޖެހޭ ސަބަބު ތަކުގެ ތެރޭގައިވެސް އެ މެމްބަރުން ސަރުކާރާއި ދެކޮޅަށް މަސައްކަތް ކުރެއްވުން ހިމެނޭ ކަމުގައި ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައްޔިތުންގެ މަޖިލީހުގެ އިންތިޚާބުގެ އެމްޑީޕީގެ މިސްރާބު ހަމަމަގަށް ކެމްޕޭނުގެ ތެރެއިން ރޭ ބޭއްވި ކެމްޕޭން ޖަލްސާގައި ވާހަަކަފުޅު ދައްކަވަމުންނެެވެ.

ރައީސް ޞާލިޙް ވިދާޅުވީ، ރައްޔިތުންގެ މަޖިލީހުގައި ސަރުކާރާއި އިދިކޮޅަށް ތިބި ބަޔަކީ، ސަރުކާރަށް ނިސްބަތްވާ މެމްބަރުން ކަމަށެވެ.

ސަރުކާރުން މަޖިލީހަށް ހުށައެޅި ސޮވްރިން ޑިވެލޮޕްމެންޓް ފަންޑުގެ ބިލު ބަލައިގަތުމާއި މެދު ރައްޔިތުންގެ މަޖިލީހުގައި ވޯޓުނެގިއިރު ތަޅުމުގައި ސަރުކާރުގެ އެއްވެސް މެމްބަރަކު ނެތުމާއި އެކު އެބިލު ބަލައިގަތުމަށް ފާސްނުވެ މަޖިލީހުގެ ތަޅުމުން އެބިލް ޖެހުނީ ބޭރުކޮށްލާށެވެ. 

ރައީސް ޞާލިޙް ވިދާޅުވީ، ސަރުކާރުން ހުށައަޅާ ކަންކަމަށް އެއްބާރުލުންދީ ފާސްކުރަން ސަރުކާރުގެ މެމްބަރުން މަސައްކަތް ކުރާނަމަ، އެކަމުގައި އިދިކޮޅު ޕާޓީން  ކުރާނެ ކަމެެއް ނޯންނާނެ ކަމަށެވެ. އެހެން ނަމަވެސް މަޖިލީހުގެ ތެރެއިން ކުރަންޖެހޭ ބައެއް ކަންކަމަކީ، ސަރުކާރުން އިދިކޮޅު ފަރާތްތަކާއި ވާހަކަ ދައްކައިގެންވެސް ކުރެވިދާނެ ކަންތައް ތަކެއްކަން ރައީސް ޞާލިޙް ފާހަގަ ކުރެއްވިއެވެ. އެމަނިކުފާނު އިތުރަށް ވިދާޅުވީ ފެންނަމުން ދަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ގޮތް ދޫނުކުރުމާއި ބޯހަރު ސިޔާސަތު ކަމަށެވެ.