ލިއޮނެލް މެސީގެ ޕްރޮފެޝަނަލް ކެރިއާ ނިންމާލުމަށްފަހު، މެސީގެ ކުޅުން ދެން ނުފެންނާނެ ދުވަހެއްގެ އިހުސާސްތައް ކުރަން އުނދަގޫ ވާނީ މެސީގެ ސަޕޯޓަރުންނަށް އެކަންޏެއް ނޫނެވެ. ފުޓުބޯޅައަށް ލޯބިކުރާ ކޮންމެ މީހަކަށް ވެސް އެއީ "ކަޅު ދުވަހަކަށް" ވާނެކަން ޔަގީނެވެ. ހަމަގައިމުވެސް މިކަމުގައި ޔަގީންވާ އެއް ކަމަކީ، އެ ދުވަސް ވަރަށް ކައިރިވެއްޖެކަމެވެ. އެކަމަށް އަހަރެމެންގެ ސިކުނޑި ތައްޔާރުކުރަންވެއްޖެ ކަމެވެ.

ސައުދީ އަރަބިއްޔާގެ މިނިވަން ޗެނަލެއް ކަމުގައިވާ "ޕޭން އެރަބް ޗެނަލް" އިން ގެނެސްދޭ "ބިގް ޓައިމް ޕޮޑްކާސްޓް" އަށް މެސީ ދިން އިންޓަވިއުއެއްގައި އޭނާ ފުޓުބޯޅަ ކުޅުން ހުއްޓާލާނެ ދުވަހާ ގުޅޭ ގޮތުން ވާހަކަދައްކައިފިއެވެ. 

މެސީ ކުޅުން ހުއްޓާލާނެ ދުވަހާ ގުޅޭ ގޮތުން މި ޕޮޑްކާސްޓް ހުށަހަޅައިދޭ ޝާހިދު ސުވާލު ކުރުމުން އޭނާ ބުނީ، އޭނާ ކުޅުން ހުއްޓާލާނީ، ފާއިތުވި ވިއްސަކަށް އަހަރު އޭނާ ދައްކަމުން އައިސްފައިވާ ޕާފޯމެންސް އޭނާއަށް އިތުރަށް ނުދެއްކެން ފެށުމުން ކަމަށެވެ. އަދި އެ ނިންމުމާ އޭނާގެ އުމުރާ އެއްވެސް ގުޅުމެއް ނެތްކަމަށް ވެސް ބުނެފައިވެއެވެ.

މީގެ އިތުރުން މެސީއަށް ފުޓުބޯޅައިގެ ހާސިލް ނުވާ ކަމެއް އޮތްތޯ ވެސް ޝާހިދު ސުވާލުކުރިއެވެ. އެ ސުވާލުގެ ޖަވާބުގައި މެސީ ބުނީ، ފުޓުބޯޅައިގައި އޭނާ ހާސިލްކުރަން ބޭނުންވި ހުރިހާކަމެއް ހާސިލްވެއްޖެ ކަމާއި، ފުޓުބޯޅައިގައި އޭނާ އިތުރަށް ބޭނުންވާ ކަމެއް ނެތްކަމަށެވެ.