ރާއްޖޭގައި ނަޞާރާ ދީން ފެތުރުމަށްޓަކައި، އެދީނުގެ ފޮތްތަކާއި ބިޒްނަސް ކާޑުތައް ބެހުމުގެ މަސައްކަތް ކުރަމުން ދިޔަ ބިދޭސީ ދެއަންހެނަކު ފުލުހުންގެ ބެލުމުގެ ދަށަށް ގެންގޮސްފިއެވެ.

އެދެމީހުން ފުލުހުންގެ ބެލުމުގެ ދަށަށް ގެންގޮސްފައި ވަނީ، ނަޞާރާ ދީނާއި ގުޅޭ އެކި ފޮތްތަކާއި ލިޔުންތައް، ހިޔާ ސަރަހައްދުގައި ބެހުމުގެ މަސައްކަތް ކުރަނިކޮށް، ހިޔާ ގެ 6 ވަނަ ޓަވަރުންނެވެ.

ކްރިސްޓިއަން މިޝަނަރީއަަކަށް ނިސްބަތްވާ މި ދެއަންހެނުން ގެންދިޔައީ، ހިޔާގެ ޓަވަރުތަކުގެ ގްރައުންޑް ފްލޯތަކުގައި ހުންނަ މެއިލްބޮކްސްތައް، ކްރިސްޓިއަން ދީން ފެތުރުމަށް ތައްޔާރުކޮށްފައި ހުރި އެކި އެކި ލިޔުންތަކާއި، ޕޯސްޓް ކާޑުތައް އަޅަމުން ކަމުގައި މައުލޫމާތު ލިބިފައިވެއެވެ.

ފުލުހުންގެ އިދާރާއިން މީޑިއާތަކަށް ފޮނުވި މެސެޖުގައި ވިދާޅުވީ، ފުލުހުންގެ ބެލުމުގެ ދަށަށް ގެންގޮސްފައިވާ ދެ އަންހެނުންނަކީ، ޖަރުމަނު ވިލާތަށް ނިސްބަތްވާ ދެމީހުން ކަމަށާއި އެދެމީހުން ރާއްޖެއަށް އެތެރެވެފައި ވަނީ ޓުއަރިސްޓް ވިސާގައި ކަމަށެވެ.

ރޭވި އިންތިޒާމްވެގެން، ދިވެހިރާއްޖޭގައި ނަޞާރާދީން ފެތުރުމަށް ބޭރުގެ ކްރިސްޓިއަން މިޝަނަރީ ތަކުން މަސައްކަތް ކުރަމުން އަންނަތާ ވަރަށް ގިނަ އަހަރުތައް ވަނީ ވެފައެވެ. ދިވެހިންގެ ތެރެއިން ބަޔަކު ނަޞާރާދީނަށް ވެއްދުމަށް އެންމެ ބޮޑު އަމާޒަކަށް ހަދާފައިވާ އެއް ސަބަބަކީ، ދިވެހިރާއްޖެއަކީ، %100 މުސްލިމް އާބާދީއެއް އޮތް ދައުލަތަކަށް ވުމެވެ.

ދިވެހިރާއްޖޭގައި އެހެން ދީންތަކަށް ގޮވާލުމާއި، އެހެން ދީންތަކުގެ ޝިއާރުތައް ފާޅުކުރުމަކީ، ދިވެހިރާއްޖޭގެ ދީނީ އެއްބައިވަންތަކަން ޙިމާޔަތް ކުރުމުގެ ޤާނޫނުގެ ދަށުން އަދަބު ކަނޑައެޅިފައިވާ ކުށްތަކެވެ.