ކުރިޔަށް އޮތް ރައްޔިތުންގެ މަޖިލިސް އިންތިޚާބުގެ ކެމްޕޭން ކުރިޔަށް ދާއިރު ވަޒީފާގެ ބިރުވެރިކަމުގެ ވާހަކަތަކާއި، ފައިސާގެ ވާހަކަ އަޑުއިވެމުން ދިޔުމަކީ ވަރަށް ކަންބޮޑުވެވަޑައިގަންނަވާ ކަމެއް ކަމުގައި، ދެވަނަ ދައުރަކަށް ރައްޔިތުންގެ މަޖިލީހުގެ ހިންނަވަރު ދާއިރާއަށް ވާދަކުރައްވާ ޖީހާން މަޙްމޫދު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިންތިޚާބާއި ގުޅިގެން "ނޫން"އިން ގެނެސްދޭ ޚާދިމް ޕްރޮގްރާމްގައި ވާހަކަފުޅު ދައްކަވަމުން ޖީހާން ވިދާޅުވީ، ނިމިދިޔަ ރިޔާސީ އިންތިޚާބަކީ އެންމެ ގިނައިން ފައިސާގެ ވާހަކަ އަޑުވިގެން ދިޔަ އިންތިޚާބު ކަމަށެވެ. އަދި ހަމަ އެކަން ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގެ ތެރޭގައި ތަކުރާރުވަމުން އެބަދާކަމަށާއި، ވަޒީފާގެ ބިރު ދެއްކުމާއި ފައިސާގެ ނުފޫޒު ފޯރުވާކަމުގެ އަޑުތައްވެސް އިވިވަޑައިގަންނަވަމުންދާ ކަމަށެވެ.

ޖީހާން ވިދާޅުވީ، މިނިމި ދިޔަ ރިޔާސީ އިންތިޚާބުގައި ފައިސާގެ ވާހަކަތައް އަޑު އިވުނީ މީގެ ކުރިން ދުވަހަކުވެސް އަޑު އަހާފައި ނުވާ މިންވަރަށް ކަމަށެވެ. އަދި މިހާރު އުފެދިފައި އޮތީ އާދަޔާ ޚިލާފު ތަފާތު ޓްރެންޑެއް ކަމުގައިވެސް ޖީހާން ވިދާޅުވިއެވެ.

ޖީހާން ވިދާޅުވީ، 2019 ވަނަ އަހަރު އެމްޑީޕީއިން މަޖިލީހުގެ ސުޕަރމެޖޯރިޓީ ނެގި އިރުވެސް މިގޮތަށް ފައިސާގެ ވާހަކަ ނުއިވޭ ކަމަށެވެ. އެހެންވެ މިހާރު މިއޮތް ހާލަތަކީ ކަންބޮޑުވާން ޖެހޭ ހާލަތެއް ކަމުގައި ޖީހާން ވިދާޅުވިއެވެ.

2019 ވަނަ އަހަރު އޮތް ރައްޔިތުންގެ މަޖިލީހުގެ އިންތިޚާބުގައިވެސް ޖީހާން ވާދަކުރެއްވީ، ރައްޔިތުންގެ މަޖިލީހުގެ ހިންނަވަރު ދާއިރާއަށެވެ. ދެވަނަ ދައުރަކަށް އެދާއިރާއަށް ނުކުންނެވުމުންގެ ހިއްވަރު ލިބިވަޑައިގަތީ، ކުރީގެ ރައީސް އިބްރާހިމް މުޙައްމަދު ޞާލިޙްގެ ލަފަޔާއި އިރުޝާދާއި އެމަނިކުފާނު ދެއްވި ހިއްވަރުން ކަމުގައިވެސް ޖީހާން ވިދާޅުވިއެވެ.

ޖީހާން ވިދާޅުވީ، އެމްޑިޕީގެ ޓިކެޓުގައި ނުކުންނެވި ނަމަވެސް އެންމެ ފުރަތަމަ ފަހަރުވެސް ވަކި ކުލަޔަކަށް ނުބައްލަވައި ދާއިރާގެ ގިނަ ރައްޔިތުން އެކަމަނާއަށް ވޯޓު ދެއްވި ކަމަށެވެ. އަދި ރައްޔިތުންގެ މަޖިލީހުގައި އެކަމަނާ މަސައްކަތް ކުރެއްވީވެސް މުޅި ދާއިރާގެ ހުރިހާ ރައްޔިތުންގެ މަސްލަޙަތު އިސްކޮށްގެން ކަމަށާއި ދެންވެސް ސާބިތުވެ ހުންނަވާނީ އެގޮތުގައި ކަމުގައި ޖީހާން ވިދާޅުވިއެވެ.

ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގެ ވޯޓުލުން އޮންނާނީ މި އަންނަ އޭޕްރީލް މަހުގެ 21 ވަނަ ދުވަހުގައެވެ.