އެމްޑީޕގެ މަޖިލިސް ކެމްޕޭނުގައި، ތިން އަތޮޅުންވެސް ދަތުރުކުރެވުނު ރަށްރަށުން ފެނުނީ މިސްރާބު ހަމަމަގަށް ގެންދިޔުމަށް މަސައްކަތްކުރާ މަންޒަރުކަމުގައި އެމްޑީޕީގެ ރައީސް އަބުދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ، އެމްޑީޕީގެ މަޖިލިސް ކެމްޕޭނުގައި، މުލަކަތޮޅާއި، ނިލަންދެ އަތޮޅު ދެކުނު ބުރީގެ ބައެއް ރަށްރަށަށް ކުރެއްވި ދަތުރުފުޅާއި ގުޅޭ ގޮތުން ލިޔުއްވި ޕޯސްޓްގައެވެ.

އެމްޑީޕީގެ ރައީސް ޢަބުދުﷲ ޝާހިދު ވިދާޅުވީ، ކެމްޕޭން ދަތުރުގައި، ރަށްރަށުގެ ރައްޔިތުންގެ ފަރާތުން އިވުނީ ސަރުކާރާމެދު ކުރެވޭ ޝަކުވާގެ އަޑު ކަމަށެވެ. އަދި މިސްރާބު ހަމަމަގަށް ގެންދިޔުމަށް މުޅި ރާއްޖެއިން އެމްޑީޕީ ކެންޑިޑޭޓުންނަށް ވޯޓު ދެއްވުމަށް އެމަނިކުފާނު އެދިވަޑައިގެންނެވިއެވެ.

މީގެ އިތުރުން، އެމްޑީޕީގެ ރައީސް ޢަބުދުﷲ ޝާހިދު ވިދާޅުވީ، މި ދަތުރުގައިވެސް އެމްޑީޕީގެ ކެމްޕޭން ޓީމްތަކުން ރޯދަ މަހުވެސް ކުރައްވަމުން ގެންދަވާ ބުރަ އެހެނަސް ފޯރިގަދަ މަސައްކަތް ފެނިވަޑައިގެންނެވި ކަމަށާއި، ކެމްޕޭން ޓީމްތަކުން އެމްޑީޕީ ކެންޑިޑޭޓުން ކުރައްވާ ބުރަ މަސައްކަތަށް ޝުކުރު އަދާކުރައްވާ ކަމަށެވެ. އަދި މިމަސައްކަތުގެ ނަތީޖާއަކަށް ވާނީ އިރާދަކުރެއްވިއްޔާ މަޖިލިސް އިންތިޚާބުގައި އެމްޑީޕިއަށް ފުރިހަމަ ކާމިޔާބެއް ލިބުންކަމުގައިވެސް އެމަނިކުފާނު ވިދާޅުުވިއެވެ.

ރައްޔިތުންގެ މަޖިލީހުގެ އިންތިޚާބު އޭޕްރީލް މަހުގެ 21 ވަނަ ދުވަހު ބޭއްވުމަށް ހަމަޖެހިފައި ވާއިރު، އެމްޑީޕީން ދަނީ މާލެ އާއި އަތޮޅުތަކުގައި ފޯރިއާއެކު ކެމްޕޭން ހަރަކާތްތައް ހިންގަމުންނެވެ.