މިއަދު މިފެންނަނީ ޕީޕީއެމްގެ ވެރިކަމުގައި ނަގާފައި ހުރި ލޯނުތަކުން މިސަރުކާރު ސަލާމަތް ނުވެވިގެން އުޅޭ މަންޒަރު ކަމުގައި ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރޭ ރަސްފަންނުގައި ބޭއްވި، މުޅި މާފަންނު މަޖިލިސް ކެމްޕޭން ބައްދަލުވުމުގައި ވާހަކަފުޅު ދައްކަވަމުންނެވެ. އެމްޑީީޕީގެ މަޖިލިސް ކެމްޕޭން މިސްރާބު ހަމަމަގަށް ކެމްޕެއިންގެ ތެރެއިން ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.

ރައީސް ޞާލިހް ވިދާޅުވީ، ރައީސް ޑރ. މުޙައްމަދު މުޢިއްޒު ދެއްކެވި ވާހަކަފުޅެއްގައި، ދިވެހިރާއްޖެއަށް އިންޑިއާއިން ދޫކޮށްފައިވާ ލޯނުތައް ރީސްޓްރަކްޗަރ ކުރަން ބޭނުންވާކަމަށާއި، އިންޑިއާއަކީ ރާއްޖޭގެ އެންމެ ގާތް ޤައުމު ކަމުގައި ވިދާޅުވެފައިވާ ކަމަށެވެ. އެހެން ނަމަވެސް މިއަދު ކުރިމަތިވެގެން މިއުޅޭ ދަތިކަމަކީ، އިންޑިއާ އިން ނަގާފައި ހުރި ލޯނުތަކުގެ މައްސަލަ ނޫންކަމުގައިވެސް ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ، އިންޑިއާއިން ނަގާފައިވާ 8 ބިލިއަން ރުފިޔާ އަކީ، 5 އަހަރުގެ ގްރޭސް ޕީރިއަޑަކަށް ފަހު 20 އަހަރުގެ ތެރޭގައި އަނބުރާ ދައްކާގޮތަށް ނަގާފައިވާ ފައިސާ ކަމަށެވެ. އަދި އެއީ 25 އަހަރު ލިބޭ ގޮތަށް ނަގާފައި ހުރި ލޯނުކަމުގައިވެސް އެމަނިކުފާނު ވިދާޅުވިއެވެ.

ރައީސް ޞާލިޙް ވިދާޅުވީ، މިއަދު ޤައުމަށް ކުރިމަތިވެގެން އުޅޭ މައްސަލައަކީ، ޕީޕިއެމްގެ ސަރުކާރުން ކުރިން ނަގާފައި ހުރި ދަރަނިތައް ކަމަށާއި، މިހާރު ސަލާމަތް ނުވެވިގެން އުޅެނީ އެދަރަނިތަކުން ކަމަށެވެ.  

ރައީސް ޞާލިޙް ވަނީ، ރާއްޖެއަށް ދިމާވާ ދަތި އުނދަގޫކަންކަމުގައި އަވައްޓެރި ޤައުމުތަކުން އެހީތައް ވެދޭނެ ކަމުގެ ޔަޤީންކަން އޮތް ކަމުގައިވެސް ވިދާޅުވެފައެވެ.