މިސަރުކާރަށް، މެދު އިރުމަތީގެ ޤައުމަކުންވެސް 50 ޓަނުގެ ކަދުރު ފިޔަވައި އެހެން އެއްޗެއް އަދި ނުލިބޭ ކަމުގައި، ކުރީގެ ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރޭ ރަސްފަންނުގައި ބޭއްވި، މުޅި މާފަންނު މަޖިލިސް ކެމްޕޭން ބައްދަލުވުމުގައި ވާހަކަފުޅު ދައްކަވަމުންނެވެ. އެމްޑީީޕީގެ މަޖިލިސް ކެމްޕޭން މިސްރާބު ހަމަމަގަށް ކެމްޕެއިންގެ ތެރެއިން ބޭއްވި މިބައްދަލުވުމުގައި ރައީސް ޞާލިޙް ދެއްކެވި ވާހަކަފުޅުގައި، މިސަރުކާރުން ޢަމަލު ކުރަމުންދާ ގޮތުގެ ސަބަބުން ދައުލަތަށާއި، ރައްޔިތުންނަށް ގެއްލުންތައް ލިބި ދޭދޭ ޤަައުމުތަކުގެ މެދުގައި އޮތް ގުޅުންތައް ކެނޑެމުންދާކަން ފާހަގަކުރެއްވިއެވެ.

ރައީސް ޞާލިޙްގެ ވާހަކަފުޅުގައި ވަނީ، ބޯހަރުކަމާއި ގޮތްދޫނުކުރުމުގެ ސިފަ މިސަރުކާރުގައި އޮތްކަން ފާހަގަކުރައްވައި، އެކަން ދޫކޮށްލެއްވުމަށް ގޮވާލައްވާފައެވެ.

މިސަރުކާރު އައިފަހުން، ރާއްޖެއަށް ޢަރަބި އިސްލާމީ ޤައުމުތަކުން ލިބުނު އެއްޗަކީ، ހަމައެކަނި 50 ޓަނުގެ ކަދުރުކަމުގައި ރައީސް ޞާލިޙް ވިދާޅުވި އިރު، އެ ކަދުރަކީ، ކޮންމެ ސަރުކާރެއް ރާއްޖޭގައި އޮތަސް ސަޢޫދީސަރުކާރުން ދިވެހިރާއްޖެއަށް ދެމުން އަންނަ ކަދުރެވެ.

ރައީސް ޞާލިޙް ވިދާޅުވީ މިސަރުކާރަށް ހަތަރުމަސް ވެގެން ދިޔައިރު، ސަޢޫދީއަރަބިއްޔާއަށް ރައީސް ޑރ. މުހައްމަދު މުޢިއްޒު ވަޑައިނުގަންނަވާކަން ފާހަގަކުރެއްވިއެވެ. ރައީސް ޑރ. މުޙައްމަދު މުޢިއްޒު ހުވާކުރައްވާ ގޮތަށް އެންމެ ފުރަތަމަ ފުރަމާނަ ދަތުރުފުޅު ކުރައްވާނެ ޤައުމުތަކުގެ ތެރޭގައި ސަޢޫދީއަރަބިއްޔާ ހިމެނޭނެކަމަށް ސަރުކާރުގެ އިސްފަރާތްތަކުން އަޑުތައް ފެތުރިއެވެ. މިގޮތުން ފުރަމާނަ ދަތުރުފުޅުގައި ތުރުކީއަށް ވަޑައިގަންނަވާނީ، ސަޢޫދީއަށް ވަޑައިގެންނެވުމަށްފަހުގައިކަން އޭރު ސަރުކާރުގެ އިސްބޭފުޅުން ވިދާޅުވަމުން ގެންދެވިކަންވެސް ރައީސް ޞާލިޙް ފާހަގަކުރެއްވިއެވެ.

ރައީސް ޞާލިޙް ވިދާޅުވީ، މިސަރުކާރު މިދަނީ ހަމަމަގުން ނޫންކަމަށާއި، ސަރުކާރު އޮތީ ހަމަމަގަށް އަޅުވަން ޖެހިފައި ކަމަށެވެ.

މިސަރުކާރު ފެށުނު ފަހުން އަވައްޓެރި އިންޑިއާ އާއި ރާއްޖޭގެ ގުޅުން ވަރަށްބޮޑަށް ގޯސްވެފައި ވާއިރު، ސަޢޫދީއަރަބިއްޔާ އާއި ރާއްޖޭގެ ގުޅުންވެސް ވަނީ ގޯސްވެފައި ކަމުގައި ސިޔާސީ ދާއިރާގެ ތަޖުރިބާކާރުންގެންދަވަނީ ވިދާޅުވަމުންނެވެ.