ބެޑްމިންޓަން އެސޯސިއޭޝަނަށް ކުރެވޭ ކޮރަޕްޝަންގެ ތުހުމަތުތަކާއެކީ، އެ އެސޯސިއޭޝަންގެ ރައީސް މޫސާ ނާޝިދުގެ ކުޅިވަރު ސާމާނު ވިއްކާ ފިހާރައާއި، އޭނާއާ ގުޅުންހުރި އެހެން ތަންތަން އެންޓި ކޮރަޕްޝަން ކޮމިޝަނުން (އޭސީސީ) ބަލާފާސްކޮށްފިއެވެ.

އޭސީސީއިން ހާމަކޮށްފައިވާ ގޮތުގައި އެ އިދާރާއިން މި އޮޕަރޭޝަން ކުރިޔަށް ގެންދަނީ ކޯޓު އަމުރެއްގެ ދަށުން ކަމުގައެވެ.

މީގެ އިތުރުން އޭސީސީއިން ވަނީ މިދިޔަ އަންގާރަ ދުވަހު ބެޑްމިންޓަން އޭސޯސިއޭޝަނުގެ އޮފީސް ވެސް ރެއިޑްކޮށްފައެވެ.

މި މައްސަލަގަނޑުގެ ތެރޭގައި، ބެޑްމިންޓަން އެސޯސިއޭޝަން އޮފް ދަ މޯލްޑިވްސްގެ ހިންގާ ކޮމެޓީ އިންތިހާބު ކުރުމަށް  މި މަހުގެ 22 ވަނަ ދުވަހު ބާއްވަން އުޅުނު އިންތިހާބު މަޑުޖައްސާލުމަށް ވެސް މީގެ ކުރިން ކޮމިޝަނަރ އޮފް ސްޕޯޓްސް މުޙައްމަދު ޠަލާލު އަންގާފައި ވެއެވެ. އެއީ ވެސް އެ އެސޯސިއޭޝަނަށް ކުރެވޭ ތުހުމަތުތަކާ ގުޅިގެންނެވެ.

އަދި މިހާރު އެސޯސިއޭޝަން އިންތިހާބުގައި ވޯޓު ލެވޭ މެމްބަރުންނަކީ އިންތިހާބަށް ނުފޫޒު ފޯރުވޭނެ ގޮތަކަށް އެ އިހްތިޔާރު ލިބިފައިވާ ބައެއްކަމަށް ގަބޫލު ކުރެވޭތީ، އިންތިހާބުގެ ކުރިން އެކަންކަން ރަގަޅު ކުރަންޖެހޭކަމަށް ވެސް ޠަލާލު ބުނެފައިވެއެވެ. މީގެ އިތުރުން ފާއިތުވި ދައުރުގެ އޮޑިޓް ރިޕޯޓު ހުށަހަޅާފައި ނުވުމަކީ ވެސް އިންތިހާބު ފަސްކުރަންޖެހޭ އިތުރު ސަބަބެއްކަމަށް އޭނާ ފާހަގަ ކުރިއެވެ.