ކުޑަ ރަށެއް ބޮޑު ރަށެއް ތަފާތުކުރުމެއް ނެތި މި ސަރުކާރުންވަނީރަށްރަށުގެ ތަރައްޤީގެ މަޝްރޫޢުތައް ހުއްޓާލާފައި ކަމުގައި ވިދާޅުވެ، އެމްޑީޕީގެ ރައީސް ޢަބުދުﷲ ޝާހިދު ޕޯސްޓް ކުރެއްވި ވީޑިއޯއަށް ސަރުކާރުގެ ވަޒީރުންނާއި ނައިބު ވަޒީރުން ރައްދުދީ ފުރައްސާރަކޮށްފިއެވެ.

އެމްޑީޕީގެ މިސްރާބު ހަމަ މަގަށް، މަޖިލިސް ކެމްޕޭނުގެ ތެރެއިން އަތޮޅުތެރެއަށް ކުރައްވަމުން ގެންދަވާ ދަތުރުފުޅުގައި، އެމްޑީޕީގެ ރައީސް ޢަބުދުﷲ ޝާހިދު ވަނީި، އިއްޔެ މ. ރަތްމަންދޫގައި ހުންނަވައިގެން އެރަށުގެ ތަރައްޤީގެ މަޝްރޫޢުތައް ހުއްޓިފައިވާކަން ބަޔާން ކުރައްވައި، އެމަނިކުފާނުގެ އަމިއްލަފުޅު ސޯޝަލް މީޑިއާއެކައުންޓްތަކުގައި ވީޑިއޯއެއް ޕޯސްޓް ކުރައްވާފައެވެ.

ޝާހިދު ޕޯސްޓް ކުރެއްވި، 1 މިނިޓް 23 ސިކުންތުގެ ކުރި ވީޑިއޯގައި އެމަނިކުފާނު ވިދާޅުވީ، މިއަދުގެ ސަރުކާރުން ކުޑަރަށެއް ބޮޑު ރަށެއް ތަފާތުކުރެއްވުމެއް ނެތި، ތަރައްޤީގެ ހުރިހާ މަޝްރޫޢުތަކެއް ވަނީ ހުއްޓަވައި ލައްވާފައި ކަމަށެވެ.

ޢަބުދުﷲ ޝާހިދު ވިދާޅުވީ، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ ސަރުކާރުގައި މ. ރަތްމަންދޫގައި ފަށާފައިވާ ތަރައްޤީގެ މަޝްރޫޢުތައް މިސަރުކާރުން ވަނީ ހުއްޓާލާފައި ކަމަށެވެ. އަދި ރައީސް ޞާލިހްގެ ސަރުކާރުން މިދިޔަ އަހަރުގެ ފުރަތަމަ ތިން މަސްދުވަހުގެ ތެރޭގައި، 1.7 ބިލިއަން ރުފިޔާ ތަރައްޤީގެ މަޝްރޫޢުތަކަށް ހޭދަކުރެއްވި އިރު، މިސަރުކާރު މިއަހަރުގެ ފުރަތަމަ ތިން މަސްދުވަހުގެ ތެރޭގައި، ހޭދަކުރައްވާފައި ވަނީ 300 މިލިޔަން ރުފިޔާ ކަމުގައި ޢަބްދުﷲ ޝާހިދު ވިދާޅުވިއެވެ.

ޢަބުދުﷲ ޝާހިދަށް ރައްދުދެއްވި ބޭފުޅުންގެ ތެރޭަގައި ވަޒީރުންނާއި، ނައިބު ވަޒީރުންނާއި، އެމްބަސީތަކުގެ ސަފީރުންނާއި، އަދި ސަރުކާރުގެ އެކި އެކި ސިޔާސީ މަޤާމުތަކުގައި ތިއްބެވި ބޭފުޅުންނާއި، އެކްޓިވިސްޓުން ހިމެނެއެެވެ. އެބޭފުޅުންގެ ތެރެއިން ގިނަ ބޭފުޅުން، ސަރުކާރުގެ ސިޔާސަތުތަކާއި މަސައްކަތްތައް ހާމަކުރެއްވުމުގެ ބަދަލުގައި ގޮވާފައި ވަނީ ބޭަދަބީ ބަސްތަކެވެ.

ޢަބުދުﷲ ޝާހިދަށް ރައްދުދެއްވައި، ކޮންސްޓްރަކްޝަން މިނިސްޓަރ ޑރ. ޢަބްދުﷲ މުއްޠަލިބު ވިދާޅުވީ، ރަށްރަށުގެ ފެނާ ނަރުދަނާގެ މަޝްރޫޢުތައް ކުރީ ސަރުކާރުން ފެނަކަ ކޯޕަރޭޝަނާއި ހަވާލު ކުރި އިރު އެރަށްރަށުގައި މަޝްރޫޢުތައް ކުރިޔަށް ގެންދިޔުމުގެ ޤާބިލްކަން އެކުންފުނީގައި ނެތް ކަމަށެވެ.