ރާއްޖޭގަ ދެވަނައަށް އެންމެ ބޮޑު އާބާދީއެއް ދިރިއުޅޭ އައްޑޫ ސިޓީއިން މިއަދުގެ މެންދުރުން ފެށިގެން ފެނުގެ ހިދުމަތް ވަނީ މެދެކެނޑިފައެވެ. ސަޕްލައި ފެނަށް ވަރަށް ބޮޑަށް ބަރޯސާވެފަ އޮންނަ އައްޑޫ ސިޓީގެ ގެތަކަށް މިކަމުގެ ސަބަބުން އަންނަނީ ދަތިތަކާ ކުރިމަތިވަމުންނެވެ.

"ނޫން" އަށް ފޯނުން ދިން އިންޓަވިއުއެއްގައި އައްޑޫ ސިޓީގެ ރައްޔިތަކު ބުނީ، ފެންވެރުމަށާއި ކެއްކުމަށް ގިނަ ގޭގޭގައި ބޭނުން ކުރަނީ ސަޕްލައި ފެން ކަމުން، ހިދުމަތް މެދުކެނޑިފައި ގިނަ ވަގުތުތަކެއް ހޭދަވަމުން ދިއުމުގެ ސަބަބުން ގިނަ ބަޔަކު އަންނަނީ އެކަމުގެ އުނދަގޫ ތަހައްމަލު ކުރަމުންނެވެ. 

އައްޑޫ ސިޓީގެ މޭޔަރު މި މައްސަލައާ ގުޅިގެން ބުނެފައިވަނީ، މިއަދު މެންދުރު ފެނުގެ ހިދުމަތް މެދުކެނޑިފައިވާއިރު، ފެނަކަ ކޯޕަރޭޝަނުން އެ މައްސަލަ ހައްލު ކުރުމަށް މަސައްކަތް ކުރަމުން އަންނަ ކަމަށެވެ. މޭޔަރު އިތުރަށް ވިދާޅުވެފައިވަނީ، މި މައްސަލަ ހައްލު ކުރުމަށް އެކަށޭނަ މަސައްކަތްތަކެއް ނުކުރެވިއްޖެނަމަ، އެ ސިޓީގައި މިކަމާ ގުޅިގެން ކާރިސާއެއް ދިމާވުމަކީ ދުރުގައި އޮތް ކަމެއް ނޫން ކަމަށެވެ.

ފެނުގެ ހިދުމަތް ލިބޭނެ ވަކި އިރެއް މޭޔަރު ހާމަކޮށްފައިނުވާއިރު، އައްޑޫ ސިޓީއިން "ނޫން" އާ ވާހަކަ ދެއްކި މީހަކު ބުނީ، މިރޭ 12 ޖަހާކަށް ހާއިރަށް ހިދުމަތް އަނބުރާ ދެވޭނެކަމަށް ރަށުތެރޭގައި ވާހަކަދެކެވޭ ކަމަށެވެ.