ފަލަސްތީނުގައި އިޒްރޭލުން ހިންގަމުންދާ ހަނގުރާމަ ހުއްޓާލުމަށް ގޮވާލާ ގަރާރެއް ކަމަށް އަޑު ފަތުރައި، އެމެރިކާއިން އެކުވެރި ދައުލަތްތަކުގެ (އ.ދ.) ސެކިއުރިޓީ ކައުންސިލަށް ހުށަހެޅި ގަރާރު ފާހެއް ނުވިއެވެ. ހުކުރު ދުވަހު ބޭއްވި ކައުންސިލް ބައްދަލުވުމުގައި ހުށަހެޅި މި ގަރާރު ފާސްވެފައި ނުވަނީ، އެ ކައުންސިލްގެ ދާއިމީ ދެ މެންބަރުން ކަމުގައިވާ ރަޝިއާ އާއި ޗައިނާ މި ގަރާރު ވީޓޯ ކުރުމުންނެވެ.

ރިޕޯޓުތައް ބުނާގޮތުން، އެމެރިކާއިން ހުށަހެޅި މި ގަރާރުގައި ބުނެފައިވަނީ ހަނގުރާމަ ހުއްޓާލަން ޖެހޭކަމަށެވެ. ނަމަވެސް ހަނގުރާމަ ހުއްޓާލުމަށް އިޒްރޭލަށް ގޮވާލާފައި ނުވާކަމަށް ރިޕޯޓުތައް ބުނެއެވެ. އަދި މި ގަރާރުގެ އިބާރާތްތައް ހުރިގޮތުން، އިޒްރޭލަށް ހަނގުރާމަ ހުއްޓާލުމަށް އެއްވެސް ޕްރެޝަރެއް ނެތްކަމަށް ވެސް ވެއެވެ.

މި ގަރާރާ ގުޅިގެން އ.ދ.އަށް ކަނޑައަޅާފައި ހުރި ރަޝީޔާގެ ސަފީރު، ވެސިލީ ނެބެންޒިއާ ވިދާޅުވީ، މި ގަރާރު ހުށަހަޅައިގެން އެމެރިކާއިން ސީދާ މަސައްކަތްކުރީ ބައިނަލްއަގުވާމީ ދުނިޔެއަށް އޮޅުވާލުމަށް ކަމަށެވެ.

Advertisement

މިކަމާ ގުޅިގެން ޗައިނާގެ މަންދޫބު ވިދާޅުވީ، ގަރާރުގެ ބަސްމަގުހުރީ މާނަ ކުރުމުގައި އޮޅުން އަރާފަދަ ގޮތަކަށް ކަމަށާއި، ކުރުމުއްދަތެއްގައި ހަނގުރާމަ ހުއްޓާލުމަށް އިޒްރޭލަށް އެ ގަރާރުގައި ގޮވާލާފައި ނުވާކަމަށެވެ.

އެމެރިކާއިން ހުށަހެޅި މި ގަރާރުގައި ހަނގުރާމަ ހުއްޓާލުމުގެ ވާހަކަތަކާ ގުޅުވައި، ހަމާސްއިން ހައްޔަރުކޮށްފައިވާ އިޒްރޭލުގެ މީހުން ދޫކޮށްލުމުގެ ވާހަކަތައް ވެސް ހިމަނާފައި ހުއްޓެވެ.

ރަޝިއާ އަދި ޗައިނާއިން މި ގަރާރު ވީޓޯ ކުރުމުން އެމެރިކާއިން އ.ދ.އަށް ކަނޑައަޅާފައި ހުންނަ އެމްބެސެޑަރ، ލިންޑާ ތޯމަސް-ގްރީންފީލްޑް ބުނީ، އެ ދެ ގައުމުން އުޅެނީ ސިޔާސީ ފައިދާތަކެއް ހޯދުމަށް ކަމަށާއި، ހަނގުރާމަ ހުއްޓާލުމަށް އެދެވޭ މަސައްކަތްތަކެއް އެ ގައުމުތަކުން ނުކުރާ ކަމަށެވެ.