ކުޑަކުދިންނަށްކުރާ ޖިންސީ ގޯނާތަކާއި ގުޅޭ މައްސަލަތަކުގައި ހިމެނޭ މީހުން އަނބުރާ މުޖުތަމައުއަށް ދޫކޮށްލަން ޖެހުމަކީ ބަލައިގަނެވޭނެކަމެއް ނޫންކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ވިދާޅުވެއްޖެއެވެ. ރައީސުލްޖުމްހުރިއްޔާ މިހެން ވިދާޅުވީ "އެކްސް" ގައި މިއަދު ކުރެއްވެވި ޕޯސްޓެއްގައެވެ.

ރައީސުލްޖުމްހޫރިއްޔާ ވިދާޅުވީ ކުޑަކުދީންނަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށް، ނުވަތަ ޙުކުމް ކޮށްފައިވާ މީހުންނަށް މަޢާފުދިނުން، ނުވަތަ ލުއިދީ ދޫކޮށްލުމަކީ އެއްގޮތަކަށްވެސް ބަލައިގަނެވޭނޭ ކަމެއްނޫންކަމަށާއި، މިގޮތަށް ނިންމާ ނިންމުންތައް އިސްތިއުނާފު ކުރުމަށް ސަރުކާރުން ޕީޖީގައި ދަންނަވަމުންދާކަމުގައެވެ.

މީގެ އިތުރުން ރައީސުލްޖުމްހޫރިއްޔާ އެދިވަޑައިގަތީ، މިފަދަ މުޑުދާރު އަމަލުތައްކުރާ ފަރާތްތަކުގެ ނުބައި ވަކިތަކުން މި މުޖުތަމައު ސަލާމަތްކުރުމަށް އެންމެން އެކުގައި މަސައްކަތް ކުރުމަށެވެ.

ރައީސުލްޖުމްހޫރިއްޔާ މިފަދަ ޕޯސްޓެއް ކުރެއްވީ ސީދާ ކޮންމައްސަލައަކާ ގުޅިގެންކަމެއް އަދި ހާމަކޮށްފައެއް ނުވެއެވެ.