މާލޭގެ މަގުތަކުގެ މައްޗަށް ކުނިއެޅުން ނުހުއްޓޭތީ، މަގުމައްޗަށް ކުނިއަޅާ މީހުންގެ ފޮޓޯ އާއި ވީޑިއޯ ހިއްސާ ކުރުމަށް މާލޭ ސިޓީ ކައުންސިލުން އެދިއްޖެއެވެ.

މިފަދަ މައްސަލަތައް ހުށަހެޅުމަށް މާލޭ ސިޓީ ކައުންސިލުންވަނީ އޮންލައިން ޕޯޓަލްއެއް ވެސް (https://complaints.malecity.gov.mv/) ތައާރަފްކޮށްފައެވެ. އެގޮތުން މައްސަލަ ހުށަހަޅާ ފަރާތުގެ ނަމާއި، އީމެއިލް ނުވަތަ މޯބައިލް ނަމްބަރު ޖެއްސެވުމަށްފަހު، ޝަކުވާއާ ގުޅޭ ސަރަހައްދާއި، އަވަށާއި ލިޔުއްވައި، އެ ޝަކުވާ ސިޓީ ކައުންސިލާއި ހިއްސާކުރުމުގެ ފުރުސަތު މި ޕޯޓަލް އިން ފަހިކޮށްދީފައިވެއެވެ. މީގެ އިތުރުން މި ޝަކުވާއާއެކު ފޮޓޯ އަދި ވީޑިއޯ ވެސް ހުށަހެޅޭނެއެވެ.

މަގުތަކުގެ މައްޗަށް ކުނިއަޅާ މީހުންގެ މައްސަލަތައް ރިޕޯޓު ކުރުމަށް ފަސޭހަ ކުރުމުގެ ގޮތުން ސިޓީ ކައުންސިލުން މޯބައިލް ނަންބަރެއްވެސް ސޯޝަލް މީޑިއާގައި ހިއްސާކޮށްފައިވެއެވެ. އެ ކައުންސިލުން އެދިފައިވަނީ ވައިބާ ނުވަތަ ވަޓްސްއަޕް މެދުވެރިކޮށް، މަގުމައްޗަށް ކުނިއަޅާ މީހުންގެ ފޮޓޯ އާއި ވީޑިއޯ 9341144 އާ ހިއްސާކުރުމަށެވެ.

މަގުމައްޗަށް ކުނިއަޅާ މީހުންގެ ފޮޓޯ އާއި ވީޑިއޯ ސިޓީ ކައުންސިލުން މިހާރު އާންމު ކުރަން ފަށާފައިވާއިރު، ފުލުހުންނާ ގުޅިގެން މި މައްސަލަ ހައްލު ކުރުމަށް ދަނީ މަސައްކަތްކުރަމުންނެވެ. އަދި މަގުތަކަށް ކުނިއަޅާ މީހުންނަށް ނަސޭހަތް ދީ ޖޫރިމަނާ ކުރުމުގެ މަސައްކަތް ވެސް ކަމާ ގުޅޭ އިދާރާތަކާ ގުޅިގެން ކުރަމުން އަންނަކަމަށް ސިޓީ ކައުންސިލުން ބުނެފައިވެއެވެ.