ހުކުރު ދުވަހުގެ ފަތިހާއި އެ ދުވަހުގެރޭ ހުޅުމާލޭގެ އެކި ސަރަހައްދުތަކުން ކަރަންޓު ކެނޑެން މެދުވެރިވީ، ސްޓެލްކޯގެ ސަބްސްޓޭޝަންތައް ހަލާކުކޮށް، އެތަންތަނަށް ވަދެ، އެ ތަންތާގައި ހުރި ޓްރާންސްފޯމަރުތަކުގެ އެކި ބައިތަށް ވަގަށް ނަގަމުންދާތީ ކަމުގައި އެ ކުންފުނީގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވެއްޖެއެވެ. 

މިކަމާ ގުޅިގެން ކަރަންޓުގެ އަސާސީ ޚިދުމަތް މެދުނުކެނޑި 24 ގަޑިއިރު ދިނުމަށް ސްޓެލްކޯއަށް ދަތިތަކާ ކުރިމަތިވެފައިވާކަމަށް ހާމަކުރަމުން އެ ކުންފުނީގެ އެމްޑީ ވިދާޅުވީ، މި މައްސަލަ ބެލުމަށް ކަމާ ގުޅޭ އިދާރާތަކަށް މިހާރު ހުށަހަޅާފައިވާނެ ކަމަށެވެ. އެ ކުންފުނިން ކަމާބެހޭ ފަރާތްތަކުގެ ފަރާތުން އެދިފައިވަނީ، މިފަދަ ވައްކަންތައް ކުރާ ފަރާތްތަކުގެ އިތުރުން، ވަގަށް ނަގައިގެން ވިއްކާ މިފަދަ ތަކެތި ގަންނަ ފަރާތްތަކާމެދު ވެސް ފިޔަވަޅުއެޅުމަށެވެ. 

މި ސީރިއަސް މައްސަލައިގެ ކަންބޮޑުވުން، އެ ކުންފުނީގެ އެމްޑީ ހުސެއިން ފަހުމީ ވަނީ ސޯޝަން މީޑިއާގައި ވެސް ހިއްސާ ކުރައްވާފައެވެ. ފަހުމީ ވިދާޅުވީ، ސްބްސްޓޭޝަންތަކަށް ވަދެ، އެތަންތާ ހުރި ޓްރާންސްފޯމަރުތަކާ ބެހުމަކީ ހަގީގަތުގައި އެކަން ކުރާ ފަރާތްތަކަށް ވެސް އޮތް ބޮޑު ނުރައްކަލެއް ކަމަށެވެ.