އިންޑިއާގެ ބިހާރުގައި ހަދަމުން ދިޔަ ބްރިޖެއް ވެއްޓި އެކަކު މަރުވެ މަދުވެގެން 9 މީހުން ޒަޚަމްވެއްޖެއެވެ.

މިހާދިސާ ހިނގާފައި ވަނީ މިއަދުއެވެ. އިންޑިއާގެ ނޫސްތަކުން ރިޕޯޓްކޮށްފައިވާ ގޮތުގައި ހަދަމުން ދިޔަ ބުރިޖުގެ ސްޕަރ ސްޓްރަކްޗަރތައް ގުޅުވުމުގެ މަސައްކަތް ކުރަމުން ދަނިކޮށް ބުރިޖުގެ ބައެއް ބައިތައް ވެއްޓި އަނިޔާވީ އެމަސައްކަތް ކުރުުމުގައި ހަރަކާތްތެރިވަމުން ދިޔަ މީހުންނަށެވެ.

ވެއްޓުނު މިބްރިޖަކީ، ބިހާރުގެ ބޭޖާ އާއި ބަކޫރް ގުޅާލުމަށް އަޅަމުން އައި ބްރިޖެކެވެ. ވެއްޓުނު ބުރިޖުގެ ބައިތަކުގެ ދަށުގައި 10 ވަރަކަށް މީހުން ތާށިވެފައިވާ ކަމަށާއި އެމީހުން ސަލާމަތް ކުރުމަށް މަސައްކަތް ކުރަމުންދާ ކަމުގައިވެސް ބިހާރުގެ ކަމާއި ބެހޭ ފަރާތްތަކުން ހާމަކޮށްފައިވެއެވެ.

ކޯރެއް ހުރަސްކޮށް އަޅަމުން ދިޔަ މިބުރިޖުގެ ސްޕަރ ސްޓްރަކްޗަރތަކުގެ ބައެއް ވެއްޓުނީ ބުރިޖުގެ ފެންވަރުދަށްވުމުގެ ސަބަބުންކަމުގައި، މާހިރުން ބުނެފައިވެއެވެ.

ވެއްޓުނު ބުރިޖަކީ ބިހާރުގައި، ބާރަތު މާލާ ޕްރޮޖެކްޓްގެ ދަށުން އަޅަމުން އަންނަ ބުރިޖެކެވެ. އެބްރިޖުގެ އަގަކީ، 12 ބިލިއަން ރުޕީސް ނަމަވެސް މިހާތަނަށް އެބްރިޖަށް 117 ބިިިލިއަން ރުޕީސް ޚަރަދުވެފައިވާ ކަމަށްވެސް ރިޕޯޓްތައް ބުނެއެވެ.

މިދިޔަ އަހަރުވެސް ބިހާރުގައި، ގަންގާ ކޯރު ހުރަސްކޮށް އަޅާފައި އޮތް ބުރިޖެއް ވެއްޓުނެވެ.