ސައުދީ އަރަބިއްޔާގެ އަލް ނަސްރަށް މިހާރު ކުޅެމުންދާ ދުނިޔޭގެ ތަރި، ކްރިސްޓިއާނޯ ރޮނާލްޑޯ، ރެޑް ސީގައި ހަދަމުންދާ ރިޒޯޓުގެ ބައެއް މަންޒަރުތައް ރޮނާލްޑޯގެ އިތުރުން އޭނާގެ ޕާޓުނާރ، ޖޯޖީނާ ރޮޑްރިގޭޒް، ސޯޝަލް މީޑިއާގައި އާންމުކޮށްފިއެވެ. މި މަންޒަރުތައް ސޯޝަލް މީޑިއާގައި ޖޯޖީނާ އާންމުކޮށްފައިވަނީ، ރޮނާލްޑޯއާ އޭނާގެ އާއިލާ އެ ރިޒޯޓަށް މި ނިމުނު ހަފްތާގައި ކުރި ދަތުރުގައެވެ.

ޖޯޖީނާއާއި ރޮނާލްޑޯ ސޯޝަލް މީޑިއާގައި އާންމުކުރި ބައެއް ފޮޓޯތަކާއި ސްޓޯރީތަކުން، އެ އާއިލާ ޗުއްޓީ ހޭދަކޮށްލުމަށް ދިވެހި ރާއްޖެއަށް އައިސް ތިބެ އެ ހިއްސާކުރަނީ ރާއްޖޭގެ މަންޒަރުތައްކަމަށް ހީވެދާނެއެވެ. ނަމަވެސް ރަގަޅަށް ބަލާލުމުން އެނގޭ ގޮތުގައި، ރޮނާލްޑޯ މި މަސައްކަތް ކުރަނީ ރެޑް ސީގައި ރާއްޖެފަދަ ގުތުރަތީ ރީތިކަމެއް ލިބިފައި އޮތް، އަދި ދުނިޔެމަތީ ސުވަރުގޭގެ ގޮތުގައި ގިނަ ބަޔަކު ދެކޭ، ރާއްޖޭގެ ރިޒޯޓަކާ އެއްފަދަ ރިޒޯޓެއް ބިނާ ކުރުމަށެވެ.

Advertisement

ޖޯޖީނާގެ އިންސްޓްގްރާމް ސްޓޯރީތަކުން

ޖޯޖީނާ އޭނާގެ އިންސްޓަގްރާމް ސްޓޯރީގައި ރޮނާލްޑޯ ޓެގް ކުރުމަށްފަހު ބުނެފައިވަނީ "ބިލްޑިން ދަ ނިއު ޕެރެޑައިސް" ކަމަށެވެ. މި ޕްރޮޖެކްޓު ކުރިޔަށް ގެންދިއުމުގައި ދެ މީހުންގެ ޝައުގުވެރިކަން ހުރި މިންވަރު ވެސް ވަނީ މި ވީޑިއޯއިން ފެނިގެން ގޮސްފައެވެ. ފޮޓޯތަކާއި ވީޑިއޯތަކުން ފެންނަ ގޮތުގައި، ވިލާ ތަކުގައި ޕްރައިވެޓް ބީޗުގެ އިތުރުން ހަދާފައިވާ ސްވިމިން ޕޫލްތައް ވަނީ މޫދާ ގުޅުވާލާފައެވެ. އަދި ވޯޓާ ވިލާތައް ހަދާފައިވަނީ ރަތް ކަނޑު ފެންނަ ގޮތަށެވެ.

ވަކި ޖަޒީރާއެއްގެ ގޮތުގައި އޮންނަ މި ރިޒޯޓަށް ދެވެނީ ބޯޓެއް ނުވަތަ ސީޕްލޭނެއް ޗާޓާކޮށްގެންނެވެ. އަދި މި ރިޒޯޓުގައި ހުންނަ ވިލާތަކާއި ސޫޓުތަކުގެ އަގު ފެށެނީ ރެޔަކަށް 5،655 ޕައުންޑުން (ގާތްގަނޑަކަށް 1 ލައްކަ ރުފިޔާ) ކަމުގައި ރިޕޯޓުތައް ބުނެއެވެ.