ރާއްޖެއަށް އަންސްކިލްޑް ލޭބަރުން ބޭނުންވާ މިންވަރު ދެނެގަތުމަށް ދިރާސާއެއް ހެދުމުގެ މަސައްކަތް ފައްޓަވާފައިވާ ކަމުގައި މިނިސްޓަރ އޮފް ހޯމް އެފެއާޒް ޢަލީ އިޙްސާން ވިދާޅުވެއްޖެއެވެ.

މިނިސްޓަރ އިޙްސާން މިހެން ވިދާޅުވީ، ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި، ވަޒީރުންނާއި ސުވާލު ކުރުމުގެ ވަގުތުގައި ވިލުފުށި ދާއިރާގެ މެމްބަރު ޙަސަން އަފީފް ކުރެއްވި ސުވާލަށް ޖަވާބު ދެއްވަމުންނެވެ.

މެމްބަރު ޙަސަން އަފީފު ސުވާލު ކުރައްވާަފައި ވަނީ، ރާއްޖޭގައި ބިދޭސީގެ މައްސަލަތައް ބޮޑުވެފައި ވާއިރު، ރާއްޖެއަށް ބިދޭސީން ބޭނުންވެފައި ވަނީ ކޮންދާއިރާއަކުން ކިހާވަރަކަށްތޯ ސަރުކާރުން ބަލާފައިވޭތޯ އާއި އެފަދަ މަސައްކަތެއް ކުރުމުގެ ވިސްނުމެއް ސަރުކާރުން ގެންގުޅުއްވާތޯއެވެ.

Advertisement

މެމްބަރުގެ ސުވާލަށް ޖަވާބު ދެއްވަމުން މިނިސްޓަރ އިޙްސާން ވިދާޅުވީ، ރާއްޖެއަށް ބޭނުންވާ އަންސްކިލްޑް ލޭބަރސްގެ ނީޑް އެނަލިސިސްއެއް މިހާރު ސަރުކާރުން ކުރަމުން އެބަގެންދާ ކަމަށާއި، މިއަދާއި ހަަމައަށް އެކަމުގެ ފުރިހަމަ ދިރާސާއެއް ހަދާފައި ނުވާކަމުގައިވެސް މިނިސްޓަރ ވިދާޅުވިއެވެ.

މިނިސްޓަރ އިޙްސާން ވިދާޅުވީ އެމޭރުމުން މަސައްކަތެއް ކުރެވެމުން އެބަދާކަމަށާއި، އެ (އެނަލަސިސް) ހެދުމަށްފަހުގައި، ޤާނޫނުގައި ބުނާ އެއްލައްކައިގެ އަދަދު ހިފެހެއްޓޭނެ އަދަދަކީ އެއީ ކަމުގައިވެސް މިނިސްޓަރ އިހްސާން ވިދާޅުވިއެވެ. އަދި މިހާރު އެއްލައްކަ ކަމަށް ކަނޑައަޅާފައި އޮތީ އާބިޓްރަރީކޮށް ކަމުގައިވެސް މިިނިސްޓަރ އިހްސާން ވިދާޅުވިއެވެ.

މިނިސްޓަރ އިޙްސާން ވިދާޅުވީ ބިދޭސީ މަސައްކަތްތެރިން ބޭނުންވާ މިންވަރުގެ ދިރާސާ ހެދުމަށްފަހުގައި އެބޭނުންވާ މިންވަރަށް ބަލާފައި، ނޫނީ މިހާރު އޮތް ގޮތް ބަދަލުކުރުމާއި ގުޅޭ ގޮތުން ހުށައެޅުމެއް ހުށަނާޅުއްވާނެ ކަމުގައިވެސް މިނިސްޓަރ ވިދާޅުވިއެވެ.

ޤާނޫނުގައި މިހާރު ކަނޑައަޅާފައި ވަނީ، އަންސްކިލްޑް ލޭބަރުންގެ ގޮތުގައި އެއްޤައުމަކުން އެންމެ ގިނައިން ރާއްޖެއަށް ގެނެވޭނީ އެއްލައްކަ މީހުން ކަމަށެވެ.