މާލޭ ސިޓީގެ މަގުތަކުގައި، ޤަވައިދާ ޚިލާފަށް ޕާކްކޮށްފައިވާ އުޅަނދުތައް ނެގުމަށް ކުރާ މަސައްކަތުގެތެރެއިން،  ބުދަ ދުވަހުގެ ރޭވެސް 31 އުޅަނދެއް ޓޯވކޮށްފައިވާ ކަމުގައި ފުުލުހުންގެ އިދާރާއިން ވިދާޅުވެއްޖެއެވެ.

ޕާކިން ވަޔަލޭޝަން ސްޓިކާ ޖެހުން ހުއްޓާލައި، ރައިސުލްޖުމްހޫރިއްޔާގެ ރިޔާސީ ވަޢުދުފުޅާއި އެއްގޮތަށް ދިން ލުޔާއި އެކު، މާލެ ސަރަހައްދުގައި ޕާކުކުރުން މުޅިން ބޮއްސުންލައިގެން ދިޔައެވެ. މިގޮތުން ޤަވާއިދަށް ބެލުމެއް ނެތި ޕާކުކުރަމުން ގެންދިޔުމުގެ ސަބަބުން އެކަން އާއްމު ރައްޔިތުންނަށް ވަރަށް ބޮޑު ތަކުލީފަކަށް ވުމާއި ގުޅިގެން މިމާރިޗު މަހުގެ ފުރަތަމަ ހަފްތާއިން ފެށިގެން ފުލުހުން ވަނީ ފިޔަވަޅުތައް އަޅަން ފަށާފައެވެ. މިގޮތުން ފުލުހުން އަޅުއްވަން ފެއްޓެވި އެންމެ މުހިއްމު ފިޔަވަޅަކީ، އާއްމު ދަތުރުފަތުރަށާއި ހިނގާ ބިނގާވެ އުޅޭ މީހުންނަށް ދަތިވާގޮތަށް ޕާކުކޮށްފައި ހުންނަ އުޅަނދުތައް ޓޯވ ކުރުމެވެ. މިގޮތުން ޓޯވ ކުރަން ފެށިފަހުން މިހާތަނަށް، ހަތަރުފުރޮޅުލީ އެއްގަމު އުޅަނދު ފަހަރުގެ ތެރެއިން، 235 އުޅަނދެއް ފުލުހުން ވަނީ ޓޯވ ކޮށްފައެވެ.

މާލޭގެ މަގުތަކުގައި ޤަވާއިދާއި ޚިލާފަށް ޕާކޮށްފައިވާ ބާއްވާ އުޅަނދުތައް ފުލުހުން ޓޯވކޮށް ނަގަމުން ދިޔަ ނަމަވެސް، ޤަވާއިދާއި ޚިލާފަށް ޕާކު ކުރުމުގެ މައްސަލައަށް ހައްލެއް ނުލިބެއެވެ.