ދުނިޔޭގެ މައި ފުޓުބޯޅަ އިދާރާ، ފީފާއާއި، އޭޝިއާގެ ފުޓުބޯޅަ އިދާރާ، އޭއެފްސީއިން އަންގައިގެން ދެވަނަ ފަހަރަށް ތާވަލުކުރި އެފްއޭއެމްގެ އިންތިހާބުގެ ކަންކަން އަނެއްކާ ވެސް މަޑުޖައްސާލައިފިއެވެ. އިންތިހާބު މަޑުޖައްސާލުމަށް މި ފަހަރު އެންގީ އެފްއޭއެމްއާ ގުޅޭ މައްސަލަތަކެއް ފީފާ އާއި އޭއެފްސީއިން ބަލަމުން ދާތީއެވެ.

އެފްއޭއެމްގެ އިންތިހާބު ފުރަތަމަ ބޭއްވުމަށް ތާވަލުކުރީ މި އަހަރުގެ ޖެނުއަރީ 31 ވަނަ ދުވަހުއެވެ. ނަމަވެސް އެފްއޭއެމްގެ އުސޫލާ އެއްގޮތަށް އިލެކްޓޯރަލް ކޮމިޓީތައް އައްޔަނުކޮށްފައި ނެތުމުން، އިންތިހާބުގެ ކަންކަން މަޑުޖައްސާލަން ފީފާއާއި އޭއެފްސީއިން އެންގިއެވެ.

އެއަށްފަހު އެފްއޭއެމްގެ އެކްސްޓްރާ އޯޑިނަރީ ކޮންގްރެސްއެއް ބާއްވައި މި ކޮމެޓީތައް އެކުލަވާލިއެވެ. އަދި އެއަށްފަހު އަލުން އިންތިހާބު ބާއްވާނެ ތާރީހެއްކަމަށް ކަނޑައެޅީ އެޕްރީލް 20 ވަނަ ދުވަހުއެވެ. ނަމަވެސް އަނެއްކާ ވެސް އިންތިހާބު މަޑުޖައްސާލުމަށް ފީފާއާއި އޭއެފްސީ އަންގާފައިވާކަމަށް، އެފްއޭއެމްގެ ވަގުތީ ޖެނެރަލް ސެކްރެޓަރީ ޖައުޝަން ޝަރީފް ވަނީ ހާމަކޮށްފައެވެ.

ޖެނުއަރީ މަހު ބާއްވަން އިއުލާންކުރި އިންތިހާބުގައި ވާދަކުރުމަށް ހުށަހެޅީ ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު، އަހުމަދު ތޯރިގު (ޓޮމް) އާއި ކްލަބް އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ)އެވެ. ނަމަވެސް މި އަންނަ މަހު ބާއްވަން މަސައްކަތްކުރި އިންތިހާބަށް ކުރިމަތިލުމުގެ މުއްދަތު ހަމަވިއިރު، މުފާ ފޯމު ހުށަހަޅާފައެއް ނުވެއެވެ. އަދި މި އިންތިހާބުގައި ޓޮމްގެ އިތުރުން ދެން ވާދަކުރަނީ އެފްއޭއެމްގެ މިހާރުގެ ރައީސް ބައްސާމް އަދީލް ޖަލީލް ކަމުގައި ރިޕޯޓުތައް ބުނެއެވެ. އިންތިހާބުގައި ވާދަކުރުމަށް ކުރިމަތިލާފައިވާކަން ޓޮމް އިއުލާންކުރިނަމަވެސް ބައްސާމް އެކަން ހާމަކޮށްފައެއް ނުވެއެވެ.