ރާއްޖޭގެ މީހުން ދިރިއުޅޭ ހުރިހާ ރަށެއްގައި، 2027 ވަނަ އަހަރުގެ ކުރިން ފުލުހުންގެ ޚިދުމަތް ޤާއިމް ކުރުމަށް އަމާޒު ހިފާފައިވާ ކަމުގައި، މިނިސްޓަރ އޮފް ހޯމް އެފެއާޒް ޢަލީ އިޙްސާން ވިދާޅުވެއްޖެއެވެ.

މިނިސްޓަރ އިޙްސާން މިހެން ވިދާޅުވީ، އިއްޔެ ބޭއްވި ރައްޔިތުންގެ މަޖިލީހުގެ ޖަލްސާގައި ވަޒީރުންނާއި ސުވާލު ކުރުމުގެ ވަގުތުގައި، މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

މިނިސްޓަރ އިޙްސާން ވިދާޅުވީ، ރާއްޖޭގައި ފުލުހުންގެ ޚިދުމަތް ޤާއިމްވެފައި ނެތް 46 ރަށެއްމިހާރު އެބައޮތް ކަމަށެވެ. އެހެން ނަމަވެސް މިހާރު އަމާޒު ހިފާފައި ވަނީ، 2027 ވަނަ އަހަރުގެ ކުރިން ރާއްޖޭގައި މީހުން ދިރިއުޅޭ ހުރިހާ ރަށެއްގައިވެސް ފުލުހުންގެ މަރުކަޒުތައް ޤާއިމް ކުރުމަށް ކަމުގައި މިނިސްޓަރ ވިދާޅުވިއެވެ.

މީގެ އިތުރުން މިނިސްޓަރ ވިދާޅުވީ، އަތޮޅުތަކުގެ ރަށްރަށުގައި ފުލުހުންގެ އަމިއްލަ އިމާރާތްތައް ޤާއިމްކުރުމުގެ މަސައްކަތްތައްވެސް ކުރިޔަށްދާ ކަމަށެވެ. އަދި ގިނަ ރަށްރަށުގައި ފުލުހުންގެ މަރުކަޒުތައް ޤާއިމް ކުރެވިފައިވަނީ، ރައްޔިތުންގެ އިމާރާތްތަކާއި ކުލީ އިމާރާތްތަކުގައި ކަންވެސް މިނިސްޓަރ ވަނީ ފާހަގަކުރައްވާފައެވެެ.