ކުރިޔަށް އޮތް ރައްޔިތުންގެ މަޖިލީގުގެ އިންތިޚާބުގައި މާލެއިން އެމްޑީޕީއަށް ކާމިޔާބު ކުރެވޭ ގޮނޑިތަކުގެ އެންމެ ކުރީގައި، މާފަންނު އުތުރު ދާއިރާގެ ގޮނޑި ހިމެނޭނެ ކަމުގައި ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، 20 ވަނަ ރައްޔިތުންގެ މަޖިލިސް އިންތިޚާބުގައި އެމްޑީޕީގެ ޓިކެޓްގައި އެދާއިރާގެ ގޮނޑިއަށް ވާދަކުރައްވާ އިފްޙާމް ޙުސައިންގެ ކެމްޕެއިން ޖަގަހަ ހުޅުއްވައި ދެއްވައި ދެއްކެވި ވާހަކަފުޅުގައެވެ. ރައީސް ޞާލިޙް ވިދާޅުވީ، އިންތިޚާބު އޮންނާނެ ތާރީޚެއް ނޭނގި ދިޔަ ދުވަސްތަކުގައިވެސް އެދާއިރާގެ ކެމްޕޭންތައް ކުރިޔަށް ދިޔަކަން ފާހަގަކުރެއްވުނު ކަމަށެވެ. 

ރައީސް ޞާލިޙް ވިދާޅުވީ، މާފަންނު އުތުރަކީ، އެމްޑީޕީގެ އިސްލާޙީ ހަރަކާތްތަކުގައި، ފެށުނީއްސުރެ އަދި މާކުރީއްސުރެވެސް މާފަންނު އުތުރުގެ ރައްޔިތުން ބައިވެރިވަމުން ދިޔަ ކަމަށާއި، ޚާއްޞަކޮށް ޖަވާހިރުވާދީ އެއީ މަރުކަޒެއްގެ ގޮތުގައި މަސައްކަތްތައް ކުރަމުން ދިޔަ ކަަމަށެވެ. 

ރައްޔިތުންގެ މަޖިލީހުގެ މާފަންނު އުތުރު ދާއިރާއަށް އެމްޑީޕީގެ ޓިކެޓްގައި ވާދަކުރައްވާ، އިފްޙާމް ޙުސައިން ނިސްބަތްވާ އޭނާގެ އާޢިލާގެ ގެ، މާފަންނު ޖަވާހިރު ވާދީ އާ އެމްޑީޕީއާ އޮތް ގުޅުމުގެ މައްޗަށްވެސް ރައީސް ޞާލިޙްގެ ވާހަކަފުޅުގައި އަލި އަޅުއްވާލެއްވިއެވެ. މިގޮތުން މ. ޖަވާހިރު ވާދީ އިލްޔާސް ޙުސައިންއަކީ އެމްޑީޕީ އުފެއްދުމަށް އިސްނެގި ތިން މުއައްސިސުންގެ ތެރެއިން އެއް މުއައްސިސްކަަމުގައިވެސް ރައީސް ޞާލިޙް ވިދާޅުވިއެވެ.

ރައްޔިތުންގެ މަޖިލީހުގެ މިފަހަރުގެ އިންތިޚާބުގައި ވާދަކުރައްވާ އިފްހާމްގެ އިތުރުން، އަލިފުށި ދާއިރާގެ މިހާރުގެ މެމްބަރު އަދި މިފަހަރުވެސް އެދާއިރާއަށް ވާދަކުރައްވާ މުޙައްމަދު ރަޝީދު ޙުސައިންއަކީވެސް، މ. ޖަވާހިރު ވާދީގެ ބޭފުޅެކެވެ.

19 ވަނަ ރައްޔިތުންގެ މަޖިލީހުގައިވެސް މާފަންނު އުތުރު ދާއިރާގެ ގޮނޑު ކާމިޔާބުކޮށްފައި ވަނީ އެމްޑީޕީންނެވެ. އެގޮނޑިއަށް އިންތިޚާބުވެ ވަޑައިގެންނެވި، އިމްތިޔާޒް ފަޙްމީ ވަނީ، ޕާޓީގެ ތެރޭގައި އުފެދުނު ޚިޔާލު ތަފާތުވުންތަކާއި އެކު، އެމްޑީޕީގެ ތެރެއިން އަލަށް އުފެދުނު ޕާޓީ ދަ ޑިމޮކްރެޓްސް އާއި ގުޅިވަޑައިގެންފައެވެ.