ގްރޭޓާ މާލޭގެ ހަ ސަރަހައްދެއްގައި ބޮޑު ޖަމާޢަތުގައި ޢީދު ނަމާދު ކުރުމަށް ހަމަޖައްސަވާފައިވާ ކަމުގައި މިނިސްޓްރީ އޮފް އިސްލާމިކް އެފެއާޒުން ވިދާޅުވެއްޖެއެވެ.

އެމިނިސްޓްރީން ހާމަކުރައްވާފައިވާ ގޮތުގައި، ފިޠުރު ޢީދު ނަމާދު ބޮޑު ޖަމާޢަތުގައި ކުރުމަށް ހަމަޖައްސާފައި ވަނީ މާލޭގެ ދެމިސްކިތެއްގަޔާއި، ސްޓޭޑިއަމްގެ އިތުރުން، ވިލިމާލެ އާ ހުޅުމާލޭގެ ދެ ސަރަހައްދެއްގައެވެ.

ބޮޑު ޖަމާޢަތުގައި ޢީދު ނަމާދު ކުރުމަށް ހަމަޖައްސަވާފައިވާ މިސްކިތްތަކާއި ސަރަހައްދުތައް؛

-  މާފަންނު ސްޓޭޑިއަމް

- އިސްލާމީ މަރުކަޒާއި އެ މިސްކިތުގެ ސަރަހައްދު

- ކިންގް ސަލްމާން މިސްކިތާއި އެމިސްކިތުގެ ސަރަހައްދު

- ވިލިމާލޭ ފުޓްބޯޅަ ދަނޑު

- ހުޅުމާލެ 1 ގެ ސިންތެޓިކް ޓްރެކް

- ހުޅުމާލެ 2 ގެ ކްރިކެޓް ސްޓޭޑިއަމް

މި އަހަރުގެ ފިޠުރު ޢީދު ދުވަސް ދިމާވަނީ މީލާދީ ކަލަންޑަރުން ބަލާއިރު މިއަންނަ ، އޭޕްރީލް 10 ވާ ބުދަ ދުވަހާއެވެ. ޒަމާނުއްސުރެ ދިވެހިރާއްޖޭގައި ޢީދު ނަމާދު ކުރަމުން އަންނަނީ، 7:30ގައި ނަމަވެސް މިއަހަރުގެ ފިޠުރު ޢީދުން ފެށިގެން، ޢީދު ނަމާދުކުރާ ގަޑިއަކީ 7:00 ކަމުގައި ހަމަޖައްސަވައި މިނިސްޓްރީ އޮފް އިސްލާމިކް އެފެއާޒުން ވަނީ އެކަން އިޢުލާނު ކުރައްވާފައެވެ.