މަޖިލީހުގެ މެޖޯރިޓީ ސަރުކާރަށް ހޯދައިދޭން މަސައްކަތް ކުރެއްވުމަށް ސްޓެލްކޯގެ އެމްޑީ އެދިވަޑައިގެންފިއެވެ.

އެކްސްގައި ކުރެއްވި ޕޯސްޓެއްގައި ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެރިކަމާއި ހަވާލުވެވަޑައިގެންނެވި އިރު ޤައުމު އޮތީ، ބަނގުރޫޓުވުމާ ގާތުގައި ކަމަށެެވެ.

އަދި މި ހާލަތުން އަރައިގަތުމަށްޓަކައި ކުރާން އޮތް އެންމެ ބޮޑު ޤައުމީ މަސައްކަތަކީ ލޯނުތައް ރިސްޓަރަކްޗަރ ކުރުމާއި މާލީ ނިޒާމު އިސްލާހުކޮށް، ޤާނޫނީ އޮނިގަނޑު މެދުވެރިކޮށް ހެޔޮބަދަލުތައް ގެނައުންކަމަށާއި، އެކަން ކުރެވޭނީ މަޖިލީހުގެ ސުޕަރ މެޖޯރިޓީ އަގަކާނުލައި ހެޔޮ ހިތުން ސަރުކާރަށް ތާޢީދުކުރާ، ޤައުމީ ލާބައަށްޓަކައި ސަރުކާރާއިއެކު މަސައްކަތް ކުރާނެ ކެނޑިޑޭޓުންނަށް ދީގެންކަމުގައި ފަޙްމީ ވިދާޅުވިއެވެ.

އޭނާ ވިދާޅުވީ، ޤައުމީ މަސްލަހަތު އިސްކުރައްވައި ސަރުކާރު ބާރުވެރި ކުރުވުމަށް، ޤައުމީ މި މަސައްކަތުގައި ހުރިހާ ދިވެހިން އެކުގައި އެއްބައިވަންތަކަމާއިއެކު ކުރިއަށް ދިއުމަށް އެދިވަޑައިގަންނަވާކަމަށެވެ.

މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި، މަޖިލީހަށް މެމްބަރުން އިންތިޚާބު ކުރާ 93 ދާއިރާއަށްވެސް ޕީޕީއެމް ޕީއެންސީ ކެންޑިޑޭޓުން ނެރެފައިވެއެވެ. ރައްޔިތުންގެ މަޖިލީހުގެ އިންތިޚާބު އޮންނާނީ، މިއަންނަ އޭޕްރީލް މަހުގެ 21 ވަނަ ދުވަހުގައެވެ.