ދިވެހިރާއްޖޭގައި ޢީދު ނަމާދުކުރާ ވަގުތަކީ، ހެނދުނު 7:30 ކަމުގައި ޒަމާނުއްސުރެ ހަމަޖައްސާފައި އޮތް އޮތުން ބަދަލުކޮށް، މިއަހަރުގެ ފިޠުރު ޢީދުން ފެށިގެން ޢީދު ނަމާދު ކުރާ ގަޑިއަކީ، ހެނދުނު 7:00 ކަމުގައި ސަަރުކާރުން ހަމަޖައްސަވައިފިއެވެ.

މިނިސްޓްރީ އޮފް އިސްލާމިކް އެފެއާޒުން ވިދާޅުވީ، ޢީދު ނަމާދުކުރަން ފަށާވަގުތު އަވަސްކޮށްފައި ވަނީ، ރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހާއި، ދީނީ ޢިލުމްވެރިންނާއި، ފަލަކީ ހިސާބުތަކާއި ބެހޭ ކޮމިޓީއާ މަޝްވަރާކުރެއްވުމަށް ފަހުގައި ކަމަށެވެ. 

އިސްލާމިކް މިނިސްޓަރ ޑރ. މުހައްމަދު ޝަހީމް ޢަލީ ސަޢީދު ސޮއެކުރައްވާ ނެރުވާފައިވާ ބަޔާނުގައި އެނިންމުން އެގޮތަށް ނިންމެވި ކަމަށް ކަނޑައެޅުއްވި ތާރީޚަކީ މިއަދެވެ. މީގެ ކުރިންވެސް މިނިސްޓަރ ވިދާޅުވި ގޮތުގައި، އީދު ނަމާދުވެ ވަގުތު އަވަސް ކުރެއްވުމަށް ނިންމެވީ، މިހާރު ނަމާދު ކުރާ ވަގުތުގައި ބޮޑު ޖަމާޢަތްތަކުގައި ނަމާދު ކުރާއިރު، އަވި އަރާފައި އޮންނާތީ އެކަމުގެ ސަބަބުން އާއްމުންނަށް ދަތިތަކާއި ދިމާވާތީ ކަމަށެވެ.

ދިވެހިރާއްޖޭގައި ޢީދު ނަމާދު ކުރާ ގަޑިއަކީ ހެނދުނު 7:30 ކަމުގައި ކަނޑައެޅީ ކޮންޒަމާނެއްގައި ކަން އެނގޭކަށް ނެތެވެ. އެހެން ނަމަވެސްް ވަރަށް ކުރީޒަމާނުން ފެށިގެން ރާއްޖޭގައި ޢީދު ނަމާދު ކުރަމުން އައީ އެގަޑީގައެވެ.