ރާއްޖޭގައި އުޅޭ ބަނގުލަދޭޝްގެ ބިދޭސީ މަސައްކަތު މީހުންގެ ތެރެއިން، ޤަވާއިދާއި އެއްގޮތަށް ވޯކްޕާމިޓް ފީ ދައްކަނީ، 39004 މީހުން ކަމުގައި ހޯމް މިނިސްޓަރ ވިދާޅުވެއްޖެއެވެ.

ރާއްޖޭގައި ދިރިއުޅޭ ޤަވާއިދާއި ޚިލާފު ބިދޭސީންގެ މައްސަލަތަކާއި، ގުޅޭ ގޮތުން ރައްޔިތުންގެ މަޖިލީހުގެ މެމްބަރުން ރައްޔިތުންގެ މަޖިލީހުގެ މިއަދުގެ ޖަލްސާގައި ހޯމް މިނިސްޓަރ ޢަލީ އިޙްސާނާއި ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ އިޙްސާން ވިދާޅުވީ، ބަނގްލަދޭޝް މީހުންނަށް ދޫކުރެވިފައިވާ ވޯކް ޕާމިޓްތަކުގެ ތެރެއިން މިހާރުވެސް އެކްޓިވް ޕާމިޓްގެ ގޮތުގައި، 135،149 މީހުންނަށް ދޫކުރެވިފައިވާ ވޯކް ޕާމިޓް ހިމެނޭކަމަށާއި، އެހެން ނަމަވެސް ވާއިދާއި އެއްގޮތަށް ވޯކްޕާމިޓް ފީ ދައްކަނީ، 39004 މީހުން ކަމަށެވެ. އެހެންކަމުން ބަނގުލަދޭޝްގެ 96,145 މީހުންނަކީ ވިސާ ފީ ނުދައްކާ ތިބި މީހުންނެވެ.

މިނިސްޓަރ އިޙްސާން ވިދާޅުވީ، އެކްޓިވް ޕާމިޓްގެ ގޮތުގައި، 135،149 މީހުންނަށް ވޯކް ޕާމިޓް ދޫކުރެވިފައި ވީނަމަވެސް އެ އެންމެންނަކީ، ރާއްޖޭގައި ތިބި މީހުންނަށް ނުވެދާނެ ކަމަށެވެ. އަދި ދޫކުރެވިފައިވާ ވިސާ ފީ ނުދައްކާ ތިބި މީހުންނަކީވެސް ޤަވާއިދާއި ޚިލާފު މީހުން ކަމުގައި ނިންމި ދާނެ ކަމުގައި ވެސް މިނިސްޓަރ ވިދާޅުވިއެވެ.

Advertisement

ރާއްޖޭގައި ޤަވާއިދާއި ޚިލާފަށް، ދިރިއުޅޭ ބިދޭސީންގެ ސަބަބުން ޤައުމީ ސަލާމަތަށް ނުރައްކާވާ ދަރަޖައަށް ކަންކަން ގޮސްފައިވާ ކަމުގައިވެސް ހޯމް މިނިސްޓަރވެސް ވަނީ ފާހަގަކުރައްވާފައެވެ.