މާލޭ ސިޓީގެ އިމާރާތްތަކުން މަގުމައްޗަށް ފެންފައިބާ މައްސަލަ ހައްލު ކުރުމަށް ވެރިފަރާތްތަކަށް އަންނަގަން ފަށާފައިވާ ކަމުގައި މާލޭ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

އާޒިމް ވިދާޅުވީ، ދިޔަދޮވި އަދި އޭސީ ތަކުން މަގުމައްޗަށް ފެންފައިބާ މައްސަލަތަކަކީ، އެކަމުގެެ ސަބަބުން ހިނގާ ބިނގާވެ އުޅޭ މީހުންނަށް ތަކުލީފަކަށްވެފައި އޮންނަ ކަމެއް ކަމަށާއި އެކަމާއި ގުޅިގެން ކައުންސިލުން ފިޔަވަޅުތައް އަޅަން ފަށާފައިވާ ކަމަށެވެ. މިގޮތުން އަސްކަނިތަކާއި ދިޔަ ދޮވިތަކުން އަދި އޭސީން މަގުމައްޗަށް ފެން ފައިބާ 12 އިމާރާތެއް އިއްޔެ އިންސްޕެކްޓްކޮށްފައިވާ ކަމަށާއި، އަދި އެކަންކަން އިސްލާޙް ކުރުމަށް ވެރިފަރާތްތަކަށް އަންގާފައިވާ ކަމުގައިވެސް އާޒިމް ވިދާޅުވިއެވެ.

އާޒިމް ވިދާޅުވީ، މަގުމައްޗަށް ފެން ފޭބުމުގެ މައްސަލަ ދިމާވާ، ހުރިހާ އިމާރާތެއްގެ ވެރިންވެސް، ދިޔަ ދޮވިތަކާއި އޭސީ ހޮޅިތައް ވީހާވެސް އަވަހަަަކަށް ރަނގަޅުކޮށްދެއްވުމަށް އެދިވަޑައިގަންނަވާ ކަމަށެވެ.

މާލޭ ސިޓީގެ އިމާރާތްތަކުން ދުވާރުތަކުގެ މައްޗަށް، ފެން ފައިބާ މައްސަަލައަކީ، ހިނގާ ބިނގާވެ އުޅޭ މީހުންނަށް ވަރަށް ބޮޑަށް އުނދަގޫތަކާއި ކުރިމަތިލާންޖެހޭ މައްސަލައެކެވެ. މީގެ އިތުރުން ބައެއް އިމާރާތްތަކުން ޓެރަސް ފަދަ ތަންތަންދޮވެފައި، އަދި އެއްޗެހި ދޮވެފައި މަގުމައްޗަށް ފެންގަނޑު ދޫކޮށްލާ މައްސަލަ އާއިވެސް ހިނގާމީހުން ކުރިމަތިލާން ޖެހެއެވެ.