ދައުލަތުގެ މާލީ ހާލަތު ގޯސްވުމުގެ ސަބަބުން، ފުލުހުންނާއި ސިފައިންގެ މުސާރަ ބޮޑުކުރުން ފަސްކުރުމަށް ފަހުގައި،  ފުލުހުންގެ މުސާރަތައް 35 އިންސައްތަ ބޮޑުކުރައްވައިފި ކަމުގައި ފުލުހުންގެ އިދާރާއިން ވިދާޅުވެއްޖެއެެވެ.

ފުލުހުންގެ އިދާރާއިން މީޑިއާތަކަށް ފޮނުވި މެސެޖުގައި ވިދާޅުވީ، ފުލުހުންގެ މުސާރަ މިމަހުން ފެށިގެން %35 ސަރުކާރުންވަނީ ބޮޑުކޮށްދެއްވާފައި ކަމަށާއި،  އާ މުސާރައިގެ އޮނިގަނޑުގައި ހިމެނެނީ އަސާސީ މުސާރައިގެ އިތުރުން، މަޤާމުގެ އެލަވަންސް، ޖޮބް އެލަވަންސް އަދި ކުރާ މަސައްކަތާއި ގުޅޭގޮތުން ދެވޭ އެލަވަންސެކަމަށެވެ. އަދި މިއީ 2009 ވަނަ އަހަރުގެ ފަހުން އަސާސީ މުސާރާއާއިއެކު ފުލުހުންގެ މުސާރަ ބޮޑު ކުރެވުނު ފުރަތަމަ ފަހަރުކަމުގައި ފުލުހުންގެ އިދާރާއިން ވިދާޅުވެފައި ވެއެވެ.

މުސާރަ އޮނިގަނޑު ޒަމާނީކޮށް ފުލުހުންކުރަމުންދާ މަސައްކަތްތަކާ ގުޅޭގޮތުން އެލަވަންސް ތަޢާރަފް ކުރުމުގެ ގޮތުން ކުރިންދެމުންއައި އެލަވަންސްތަކަށް ބަދަލުގެނެސްފައިވާ ކަމުގައި ވެސް ފުލުހުންގެ އިދާރާއިން ވަނީ ވިދާޅުވެފައެވެ.

މައުލޫމާތު ލިބިފައިވާ ގޮތުގައި އައު އޮނިގަނޑާއި އެކު އުނި ކުރި އެލަވަންސްތަކުގެ ތެރޭގައި، ނަން ޕްރެކްޓިސިން އެލަވަންސާއި، ޔުނީފޯމް އެލަވަންސާއި ލިވިން އެލަވަންސް ހިމެނެއެވެ.