ދިރާސީ އަހަރު ފަށާ ތާރީޚާއި ދިރާސީ ކަލަންޑަރަށް ކުރީ ސަރުކާރުގައި ގެނައި ބަދަލުގެ ފައިދާއަށް ވުރެ ގެއްލުން ބޮޑު ކަމުގައި މިނިސްޓަރ އޮފް އެޑިޔުކޭޝަން، ޑރ. އިސްމާއީލް ޝަފީއު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ބޭއްވި ރައްޔިތުންގެ މަޖިީހުގެ ޖަލްސާގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ. މިނިސްޓަރ ޑރ. އިސްމާޢީލް ޝަފީޢު ވިދާޅުވީ، 2021 ވަނަ އަހަރު ދިރާސީ އަހަރު އޮގަސްޓް މަހުގައި ފަށާގޮތަށް ހަމަޖެއްސީ އެކަމާއި  ގުޅިގެން ހޯދި ހިޔާލު ހޯދުންތަކުގައިވެސް މެޖޯރިޓީ ފަރާތްތަކުން އެގޮތަށް ބަދަލުކުރުމަށް ބޭނުން ނުވާކަން ހާމަކޮށްފައި ވަނިކޮށް ހަމަށެވެ.

ކޯވިޑް-19ގެ ހާލަތާއި ގުޅިގެން ދިރާސީ އަހަރު ދޮޅު އަހަރަށް ދިގުކޮށްލުމަށް ފަހުގައި، 2021 ވަނަ އަހަރުން ފެށިގެން ދިރާސީ އައު އަހަރު ފަށަމުން އަންނަނީ އޮގަސްޓް މަހުގައެވެ. އެގޮތަށް ހަމަޖެއްސީ، ރާއްޖޭގެ ޓޫރިޒަމްގެ ޕީކް ސީޒަނާއި ސްކޫލު ބަންދު ދިމާވާތީ، ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކުގެ ހުރި ކަންބޮޑުވުމާއި، އަދި ދިރާސީ އަހަރު ފަށާގޮތަށް ދުނިޔޭގެ ޤައުމުތަކުގައި ޢަމަލުކުރަމުން އައި ގޮތްތައްވެސް ބެލުމަށްފަހުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދަކީ، ކުރިން އޮތް ގޮތަށް ޖެނުއަރީގައި ދިރާސީ އަހަރު ފަށާގޮތަށް ބަަދަލުކުރުމެވެ. އެގޮތުން 2025 ވަނަ އަހަރުގެ ޖެނުއަރީ މަހުން ފެށިގެން ދިރާސީ ފަށާނީ ޖެނުއަރީ މަހުގައި ކަމަށް ސަރުކާރުން ވަނީ ކަނޑައަޅާފައެވެ. އަދި އެބަދަލު ގެނައުމަށްޓަކައި 2023 ވަނަ އަހަރާއި 2024 ވަނަ އަހަރުގެ ދިރާސީ އަހަރު ވަނީ ކުރުކޮށްލާފައެވެ. 

ދިރާސީ ކަލަންޑަރަށް ގެނައި ބަދަލުގައި ވާގޮތުން މިހިނގާ ދިރާސީ އަހަރު މެއި މަހު ނިމޭނެއެވެ.