ތުރުކީގެ ފުރަތަމަ ޑިވިޝަން ފުޓުބޯޅަ ލީގު މެޗުގައި މިދިޔަ އާދީއްތަ ދުވަހު، ލީގުގެ ދެ ވަނައިގައި އޮތް ފެނަބާޗޭ އާއި ތިން ވަނައިގައި އޮތް ޓްރެބްޒޮންސްޕޯރ ބައްދަލުކުރި މެޗުގައި ހިނގި ހަމަނުޖެހުމާ ގުޅިގެން 12 މީހަކު ހައްޔަރުކޮށްފިކަމަށް، ތުރުކީގެ އިންޓީރިއާ މިނިސްޓަރު، އަލީ ޔާރލިކަޔާ ބުނެފިއެވެ.

ޓްރެބްޒޮންސްޕޯރ ދަނޑުގައި ކުޅުނު މި މެޗުގެ ނަތީޖާ 2-2 އިން އެއްވަރުވެ އޮވެ ނިމެންދަނިކޮށް، ބަޓްޝުއާއި 87 ވަނަ މިނެޓުގައި ކާމިޔާބުކުރި ގޯލުން ފެނަބާޗޭ މޮޅުވިއެވެ. އަދި ރެފްރީގެ ކަށިގަނޑާއެކީ ޓްރެބްޒޮންސްޕޯރގެ ސަޕޯޓަރުން ދަނޑަށް އަރާ ފެނަބާޗޭގެ ކުޅުންތެރިންނަށް ހަމަލާދޭން މަސައްކަތް ކުރިއެވެ. ސޯޝަލް މީޑިއާގައި ވައިރަލްވި ބައެއް ވީޑިއޯތައް ދައްކާ ގޮތުން، ހަމަލާތަކުން ދިފާއުވުމަށް ފެނަބާޗޭގެ ކުޅުންތެރިން ވެސް އަނބުރާ ހަމަލާދީފައިވެއެވެ. ނަމަވެސް ދަނޑުގެ ސެކިއުރިޓީ ބަލަހައްޓަން ތިބި އޮފިސަރުން ވަނީ ފެނަބާޗޭގެ ކުޅުންތެރިން އަވަހަށް ލޮކަރ ރޫމަށް ދިއުމަށް އެހީތެރިވެދީފައެވެ.

މި ހާދިސާ ހިނގުމުގެ މަހެއްހާ ދުވަސްކުރިން، ފުރަތަމަ ޑިވިޝަނުގެ އަންކަރަގުޗޫގެ ރައީސް ވެސް ވަނީ މާރާމާރީ މައްސަލައެއްގައި ހައްޔަރުކޮށްފައެވެ. އޭނާ ހައްޔަރުކުރީ ލީގު މެޗަކަށްފަހު ރެފްރީގެ މޫނު މަތީގައި ޖަހާ، މާރާމާރީ ހިންގި މައްސަލައިގައެވެ. މި ހާދިސާތަކާ ގުޅިގެން، މިވަގުތު އެންމެ ރަގަޅު ގޮތަކީ ތުރުކީގެ ލީގު މެދުކަނޑާލުން ކަމަށް ގިނަ ބަޔަކު ގަބޫލުކުރެއެވެ.

ތުރުކީގެ އިންޓީރިއާ މިނިސްޓަރު ހާމަކޮށްފައިވާ ގޮތުގައި، މިހާތަނަށް ހައްޔަރުކުރި 12 މީހުންގެ ތެރޭގައި ހިމެނެނީ ފެނަބާޗޭގެ ކޯޗަށް އަމާޒުކޮށް އެއްޗެއް އެއްލި މީހަކާއި، އެންމެ ފުރަތަމަ ދަނޑަށް އެރި މީހާއާއި، ކޯނަރު ދަނޑި ބޭނުންކޮށް ފެނަބާޗޭގެ ކީޕަރަށް އަނިޔާކުރަން މަސައްކަތްކުރި މީހަކު ހިމެނެއެވެ.