ކ. ކާށީދޫގައި ރޭ މެންދަމު ހިންގި އަލިފާނުގެ ބޮޑު ހާދިސާގައި އަނދައިގެން ދިޔަ ދޯނިތަކަކީ އެދޯނިތަކުގެ ސަބަބުން އާއްމުންނަށާއި، ރަށުގެ ރަސްމީ ފަރާތްތަކަށްވެސް އުނދަގޫތަކާއި ކުރިމަތިވެ ނައްތާލަން ބޭނުންވެފައި ހުރި އުޅަނދުތަކެއް ކަމުގައި މައުލޫމާތު ލިބިއްޖެއެވެ.

ކާށިދޫގައި ހިނގާދިޔަ އަލިފާނުގެ ހާދިސާ އާއި ގުޅޭ ގޮތުން ނޫން.އެމްވީއަށް މައުލޫމާތު ދިން އެރަށުގެ ބައެއް މީހުން ބުނީ، ރޭގެ އަލިފާނުގެ ހާދިސާއަކީ، އެކްސިޑެންޓެއް ކަަމަށް ނުބެލެވޭ ކަމަށާއި، އެއީ ގަސްތުގައި ބަޔަކު ކުރި ކަމެއް ކަމަށް ބެލެވޭ ކަމަށެވެ. އޭނާ ބުނީ އަނދައިގެން ދިޔަ ދޯނިތަކުގެ ތެރޭގައި ފަރަށް އަރައި ހަލާކުވުމުގެ ސަބަބުން އެއްގަމަށް އަރުވާފައިވާ ބޮޑު ދޯންޏަކާއި، މަރާމާތަށް އެއްގަމަށް އެރުވި ގޮތަށް ވީރާނާވާން ދޫކޮށްލާފައިވާ ދޯންޏަކާއި، އަދި ވީރާނާވެފައިވާ އެހެން ދޯންޏެއް ހިމެނޭ ކަމަށެވެ. އަދި އަނދައިގެން ދިޔަ އެދޯނިތަކުގެ ތެރެއިން ބައެއް ދޯންޏަކީ އެތަނުގައި އަރުވާފައި ހުންނަތާ 6 ނުވަތަ 8 އަހަރުވީ ދޯނިތައް ކަމަށެވެ. އެދޯނިތަކުގެ ތެރޭގައި ހިމެނޭ އެއްދޯންޏަކީ މީގެ ތިން ހަތަރު އަހަރު ކުރިން ފަރަށް އަރައި ހަލާކުވުމުން އެއްގަމަށް އަރުވާފައިވާ ދޯންޏެކެވެ.

ކާށިދޫ ކައުންސިލްގެ މެމްބަރަކު ވިދާޅުވީ، އެތަނުގައި ހުރި އެދޯނި ފަހަރަކީ، ކައުންސިލުން އެދޯނިތައް ނެގުމަށް އަންގައިގެންވެސް ނުނަގައި ހުރި ދޯނިތަކެއް ކަމަށާއި، އެދޯނިތަކުގެ ތެރޭގައި، ވަރަށް ބޮޑު މަރާމާތެއް ކޮށްގެން ނޫނީ އަލުން ބޭނުން ކުރެވޭނެ ހާލަތެއްގައި ހުރި އެއްވެސް ދޯންޏެއް ނެތް ކަމަށެވެ.

އަދި އެދޯނިތަކުގެ ވެރިފަރާތްތައް ހޯދުމަށް ކައުންސިލުން އިއުލާނުކޮށްގެންވެސް، އެދޯނިތަކުގެ ތެރެއިން އެއް ދޯނީގެ ވެރިފަރާތުން ކައުންސިލަށް ރިޕޯޓް ކުރި ކަމުގައި އެމެމްބަރު ވިދާޅުވިއެވެ. އަދި އެދޯނިތައް ނުނަގައި ހުރުމުގެ ސަބަބުން މަގުހެދުމާއި މަގުބައްތިތައް ޖެހުމުގެ މަސައްކަތަށްވެސް އޮތީ ދަތިވެފައި ކަމަށެވެ.

ކާށިދޫއިން ވާހަކަ ދެއްކި މީހުން ބުނީ، އެދޯނިތައް އެތާނގައި އަރުވާފައި ހުރިގޮތަށް ހުންނަތާ އެތައް އަހަރެއް ވެގެން ދިޔައިރު، އެތަންތަން ވެފައި ވަނީ، ރަށުގައި ދިރިއުޅޭ މަސްތުވާތަކެތި ބޭނުންކުރާ މީހުންގެ އައްޑާ ތަކަކަށް ކަމަށެވެ. މިގޮތުން އެއުޅަނދުތަކުގެ ތެރޭގައި، މަސްތުވާތަކެތި ބޭނުން ކުރުމާއި، ރަމަޟާންމަހު ދުވާލު ކެއުން ފަދަ ކަންކަން ކުރާކަމަށް ތުހުމަތު ކުރެވޭ ކަމަށްވެސް ކާށިދޫއިން ވާހަކަ ދެއްކި މީހުން ބުންޏެވެ.

ދޯނިތައް އަނދައިގެން ދިޔައިރު، އެދޯނިތަކުގެ ތެރޭގައި ބޮޑު ދެ ދޯންޏަކާއި، ލަކުޑި ދެ ދޯނި ހިމެނެއެވެ. އަނދައިގެން ދިޔައީ ހަތަރު ދޯނިކަމުގައި އެމްއެންޑީއެފްގެ މީޑިއާއި ބުނި ނަމަވެސް ކާށިދޫއިން ވާހަކަދެއްކި ބައެއް މީހުން ބުނީ، އަނދައިގެން ގޮސްފައި ވަނީ ތިން ދޯންޏެއް ކަމަށެވެ.

އޭގެ އިތުރުން އެހިސާބު ކައިރީގައި ހުރި ރުއްތަކުގައި ރޯވެ ގެއްލުންތައް ލިބުނެވެ. އަލިފާން ނިވާނެ އެކަށީގެންވާ ވަޞީލަތްތައް ކާށިދޫގައި ނެތުމާއި އެކު، މާލެއިން ދިޔަ ފަޔަމަނުން ގޮސް އަލިފާން ނިވާލެވުނު އިރު، ރޯވި ހުރިހާ ދޯންޏެއްވެސް ވަނީ މުޅިން އަނދައި ހުލިވެފައެވެ.