ކުޑަ ކަމަކުން ވެސް ގިނަ ދަރުމަ ހޯދިދާނެ.

ހަތްވަނަ އެޕިސޯޑުގައި ޝެއިޙް އިލްޔާސް ޖަމާލް ވާހަކަފުޅު ދެއްކެވީ ދެމީހެއްގެ ދެމެދުގައި ޞުލްޙަ ކުރުވުމުގެ މާތްކަމާ ގުޅޭ ގޮތުންނެވެ.

ކީރިތި ރަސޫލާ صلى الله عليه وسلمޙަދީޘްފުޅުކުރެއްވިއެވެ.

 ((أَلا أُخْبِرُكُمْ بِأَفْضَلَ مِنْ دَرَجَةِ الصِّيَامِ وَالصَّلاةِ وَالصَّدَقَةِ ؟ قَالُوا : بَلَى . قَالَ : صَلاحُ ذَاتِ الْبَيْنِ ،..) [صحيح الترمذي] .

މާނައީ: “ސުންނަތް ރޯދަ ހިފުމާއި ސުންނަތް ނަމާދުކުރުމާއި ޞަދަޤާތްކުރުމަށްވުރެ ހެޔޮކަންބޮޑު ޢަމަލެއް ތިމަންކަލޭގެފާނު ތިޔަބައިމީހުންނަށް ބަޔާންކޮށްނުދެއްވަންހެއްޔެވެ؟ އަޞްޙާބު ބޭކަލުން ދެންނެވި: ނޫނެކެވެ. (ބަޔާންކޮށްދެއްވާށެވެ!) އެކަލޭގެފާނު ޙަދީޘްކުރެއްވި: އެއީ ދެމީހުންގެދެމެދުގައި ޞުލްޙަ ކުރުމެވެ..)

ލޮބުވެތި މުސްލިމުން! މި މާތް މައްސަރުގައި ވެސް އަޅުގަނޑުމެންނާ ދިމާވެދާނެ ދެ މީހެއްގެ ދެމެދުގައި ހަމަނުޖެހުމެއް އުފެދި އަރައިރުންވާ މަންޒަރު. ނުވަތަ ދެ މީހުން އެކަކު އަނެކަކަށް އަނގައިން ނުބުނެ ގުޅުން ކަނޑާފައިވާތަން. އެފަދަ ޙާލަތެއްގައި އެދެމީހުން ޞުލްޙަވެރިކުރުވަން ކުރެވޭ މަސައްކަތަކީ ބޭކާރު މަސައްކަތެއް ނޫން. އަދި އެކަމަށްޓަކައި ހޭދަކުރާ ވަގުތަކީ ވެސް ބޭކާރު ވަގުތެއް ނޫން. އަދިކިއެއް އެއީ އެތައް ހެޔޮ ޢަމަލަކާ ނުބައްދަލު ޢަމަލެއް. އެހެންކަމުން މިފަދަ ކަންކަމުން ގިނަގުނަވެގެންވާ ސަވާބާއި ދަރުމަ ހޯދުމަށް ދަހިވެތި ވަމާތޯ!