ރާއްޖޭގެ އަތޮޅުތަކުގައި ހޮސްޕިޓަލްތައް އެޅުމަށް ކުވައިތު ފަންޑުންދޭން ހަމަޖެއްސި އެހީ ކެންސަލްކޮށްފައިވާ ކަމުގައި ހެލްތު މިނިސްޓަރ ޑރ. ޢަބްދުﷲ ޚަލީލު ވިދާޅުވެއްޖެއެވެ.

ޚަލީލު މިހެން ވިދާޅުވީ، މިއަދު އޮތް ރައްޔިތުންގެ މަޖިލީހުގެ ޖަލްސާގައި އިހަވަންދޫ ދާއިރާގެ މެމްބަރު މުޙައްމަދު ޝިފާޢު ހެލްތު މިނިސްޓަރ ޑރ. ޢަބުދުﷲ ޚަލީލާއި ކުރެއްވި ސުވާލަށްފަހު، އިތުރު ސުވާލު ކުރެއްވުމަށް މެމްބަރުންނަށް ދެއްވި ފުރުޞަތުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

ކުވައިތު ފަންޑުގެ އެހީގައި، ރާއްޖޭގައި 12 ހޮސްޕިޓަލެއް ޢިމާރާތް ކުރުމަށް ހަމަޖެހިފައިވާކަން ކުރީގެ ސަރުކާރުން ހާމަކުރިއެވެ. އޭގެ ތެރެއިން 7 ރަށެއްގައި ހޮސްޕިޓަލްތައް އެޅުމަށް ބޭނުންވާ ކޮންޓްރެކްޓަރުން ހޯދުމަށް، މިދިޔަ އަހަރުގެ އޭޕްރީލް މަހުގެ 6 ވަނަ ދުވަހު ހެލްތު މިނިސްޓްރީން އިޢުލާނުވެސް ކުރިއެވެ.

ހެލްތު މިނިސްޓަރ ޑރ. އަބުދުﷲ ޚަލީލު ވިދާޅުވީ، ކުވައިތު ފަންޑުން ދޭން ހަމަޖެއްސި އެހީ ކެންސަލްކޮށްފައި ވަނީ، އެފަންޑުގެ އެހީގައި ހިންގާ ޕްރޮގްރާމްތަކުގެ ޕްރޮކިއުމެންޓް އުސޫލުތަކާއި ޚިލާފަށް ޢަމަލުކޮށްފައިވާތީ ކަމަށެވެ. އެހެން ނަމަވެސް ހޮސްޕިޓަލްތައް އެޅުމަށް ހަމަޖައްސާފައިވާ ދާއިރާ ތަކުގެ މެމްބަރުން އެކަމާއި ގުޅޭ ގޮތުން އިތުރު ސުވާލުތައް ކުރައްވަން ފެއްޓެވުމުން މިނިސްޓަރ ވިދާޅުވީ އެކަން އިތުރަށް ސާފުކުރައްވައި މަޖިލީހާއި ޙިއްޞާ ކުރައްވާނެ ކަމަށެވެ. އޭގެ އިތުރުން އެފަންޑުން އަލުން ހަމަޖެހޭތޯވެސް މަސައްކަތް ކުރައްވަމުންދާ ކަމުގައި މިނިސްޓަރ ވިދާޅުވިއެވެ.

އަތޮޅުތަކުގައި ކުރީ ސަރުކާރުން އެޅުމަށް ހަމަޖެއްސީ ޓާޝަރީ ހޮސްޕިޓަލްތަކުގެ މަސައްކަތްތައް ހުއްޓިފައިވަނީ، ފަންޑުގެ އުސޫލާއި ރާއްޖޭން ޚިލާފުވެގެން ކަމަށް ހެލްތު މިނިސްޓަރ ޑރ. ޢަބުދުﷲ ޚަލީލު ދެއްކެވި ވާހަކަފުޅުތަކަކީ ދޮގު ވާހަކަތަކެއް ކަމަށް ތުހުމަތު ކުރައްވައި ކެނދިކުޅުދޫ ދާއިރާގެ މެމްބަރު އަޙްމަދު އީސާ ވަނީ ރައްޔިތުންގެ މަޖިލީހަށް އެކަން ސާފުކޮށްދީ ޞައްޙަ މައުލޫމާތު ދެއްވުމަށް އެދިވަޑައިގެންފައެވެ.