ރާއްޖޭގައި މިހާތަނަށް އުފެދުނު، އެންމެ މޮޅު ޑައިރެކްޓަރ މުޙައްމަދު ނިޔާޒް (ޓެޑްރ)ގެ ފިލްމު "ލަސްވިޔަސް" ގެ ދެވަނަ ޓްރައިލާ މިރޭ ދޫކޮށްލައިފިއެވެ.

އާއިލީ ގުޅުމާއި ލޯބީގެ ވާހަކައެއްގެ މައްޗަށް ބިނާކޮށްފައިވާ، ފިލްމް "ލަސްވިޔަސް"ގެ ފުރަތަމަ ޓްރައިލާ ދޫކޮށްލާފައި ވަނީ މީގެ އެއްމަސް ކުރިންނެވެ.

ޓެޑްރީ ނޫން.އެމްވީއަށް ވިދާޅުވީ، އޭޕްރީލް 12ގައި ފިލްމް ޕްރިމިއަރ ކުރުމުގެ ކުރިން އަދި އެއް ޓްރައިލާ ދޫކޮށްލާނެ ކަމަށެވެ. ޓެޑްރީ ވިދާޅުވީ، ފުރަތަަމަ ޓްރައިލާގައި ދައްކާލާފައި ވަނީ ފިލުމުގެ ތަރިންގެ ތަޢާރަފެއް ކަމަށެވެ.

މިރޭ ދޫކޮށްލި ޓްރެއިލާގައި ފިލްމުގެ ވާހަކައާއި ގުޅޭ މުހިއްމު ބައެއް މަންޒަރުތައް ހިމަނާފައިވެއެވެ. 1 މިނިޓް 58 ސިކުންތުގެ މިޓްރެއިލާގައި ފިލްމުގެ ވާހަކައާއި ފިލްމާއި މެދު މީހުންގެ ޝައުޤުވެރިކަން އުފެދޭނެ މަންޒަރުތައް ވަނީ ހިމަނާފައެވެ.

ޓެޑްރީ ވިދާޅުވީ ފިލްމުގައި އުޅޭ ކުޑަކުއްޖާގެ ބައެއް މަންޒަރުތަކާއި އެކުއްޖާގެ ވާހަކަތައް މިރޭ ނެރުނު ޓްރެއިލާގައި ހިމަނާފައިވާނެކަމަށެވެ. 

"ލަސްވިޔަސް" މިއަހަރުގެ އޭޕްރީލް 12ގައި ޕްރިމިއަރކުރުމަށް ހަމަޖައްސާފައި ވާއިރު، ފިލްމްގެ ޓިކެޓްވެސް މިހާރުވަނީ ވިއްކަން ފަށާފައެވެ. މިގޮތުން އޮލިމްޕަހުންނާއި ލަސްވިޔަސް ފިލްމުގެ ވެބްސައިޓް، ލަސްވިޔަސް ޑޮޓްކޮމްއިން މިހާރު ޓިކެޓް ގަންނަން ލިބޭނެއެވެ. އޮލިމްޕަހުން ޓިކެޓް ވިއްކަމުންދާނީ، ހެނދުނު 10އިން ހަވީރު 5އަށް އަދި ރޭގަނޑު 9:30 އިން 11:00އަށެވެ. 

ކުޅަދާނަ ޑައިރެކްޓަރ މުޙައްމަދު ނިޔާޒް (ޓެޑްރީ) އަކީ، ރާއްޖޭގެ ފިލްމް އިންޑަސްޓްރީއަށް އިންގިލާބީ ބަދަލުތަކެއް ގެނެސް ދެއްވި މޮޅު ޑައިރެކްޓަރެކެވެ. ޓެޑްރީގެ ފިލްމްތަކުގެ ތެރެއިން "ދެރިޔާ" އާއި "އަމާނާތް" އަދި އޮފީސްތަކުގެ ޓެލެޑްރާމާ މުބާރާތުގައި ހުށައަޅުއްވައި ދެއްވި، "ހުޅުކޮޅު" އަކީ ހުރިހާ ގޮތަކުންވެސް އޭރާއި އަދި މިހާރަށް ބަލާއިރުވެސް މޮޅު އުފެއްދުންތަކެކެވެ. 

ޓެޑްރީގެ "ލަސްވިޔަސް" އަކީވެސް އެފަދަ މޮޅު ފިލްމަކަށް ވާނޭ ކަމަށް މިހާރުވެސް ގިނަ ބަޔަކު ޤަބޫލު ކުރެއެވެ.