ރައްޔިތުންގެ މަޖިލީހުގެ އިންތިޚާބު 2024 ބާއްވާ ތާރީޚު އެޕްރީލް 21 ވާ އާދީއްތަ ދުވަހަށް ބަދަލުކުރުމާއި ގުޅިގެން، އިންތިޚާބުގެ އޮބްޒާވަރުންނާއި މޮނީޓަރުންނާއި، ކެންޑިޑޭޓުންގެ މަންދޫބުން އައްޔަނު ކުރުމަށް އިތުރު ފުރުޞަތެއް ދިނުމަށް އިލެކްޝަންސް ކޮމިޝަނުން ނިންމައިފިއެވެ.

އެކޮމިޝަނުން ވިދާޅުވީ، އިންތިޚާބުގެ އޮބްޒާވަރުންނާއި މޮނީޓަރުންނާއި، ކެންޑިޑޭޓުންގެ މަންދޫބުން އައްޔަނު ކުރުމަށް އިތުރު ފުރުޞަތެއް ދިނުމަށް ނިންމަވާފައި ވަނީ، 2024 މާރިޗު 19 އިން 21 ގެ ނިޔަލަށް ކަމަށެވެ.

އެހެންކަމުން އިންތިޚާބުގައި އޮބްޒާވަރުންނާއި މޮނީޓަރުންގެ ގޮތުގައި އަދި ކެންޑިޑޭޓުންގެ މަންދޫބުންގެ ގޮތުގައި އަލުން ފާސް ބޭނުންވާ ފަރާތްތަކުން އަލުން ދިން މުއްދަތުގެ ތެރޭގައި އެކަަމަށް އެދޭ ފޯމާއި ލިޔެކިޔުންތައް ފުރިހަމަކޮށް ހުށައެޅުއްވުން އެދޭ ކަމުގައި އިލެކްޝަންސް ކޮމިޝަނުން ވަނީ ވިދާޅުވެފައެވެ.

މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި، 93 ދާއިރާއަކަށް މެމްބަރުން އިންތިޚާބު ކުރާނެއެވެ. އަދި އެދާއިރާތަކަށް ވާދަކުރުމަށް، 386 ކެންޑިޑޭޓުން ވަނީ އިލެކްޝަންސް ކޮމިޝަނަށް ފޯމް ހުށައަޅުއްވާފައެވެ.