ޓެލެގްރާމް ޗެނަލްތަކެއް ހަދައިގެން، މަސްތުވާތަކެއްޗާއި ހަށިވިއްކުމާއި، ފޯޖު ޑޮކިއުމެންޓް ވިއްކުން ފަދަ މަސައްކަތްތައް ކުރަމުން ދިޔަ ޓެލެގްރާމް ގުރޫޕްތައް ފުލުހުން އަތުލައިގަނެ ފުލުހުންގެ ކޮންޓްރޯލްގެ ދަށަށް ގެންދިޔައިރު އެޗެނަލްތަަކަށް ސަބްކްރައިބްކޮށްފައިވާ މީހުންގެ އަދަދު 7000 ވުރެ މަތި ކަމުގައި ފުލުހުންގެ އިދާާއިން ވިދާޅުވެއްޖެއެވެ. ފުލުހުންގެ އިދާރާއިން މިއަދު ބޭއްވި ނޫސްވެރިންގެ ބައްދަލުވުމުގައި، ސައިބަރ ޕޮލިސިންގ ސެންޓަރުގެ އިންވެސްޓިގޭޝަން އޮފިސަރ އިންސްޕެކްޓަރ އޮފް ޕޮލިސް އާމިނަތު މުޙައްމަދު ވިދާޅުވީ، ޖަޒިރާގެ ނަމުގައި ހިންގަމުން އައި ޗެނަލްތައް ފުލުހުންގެ ކޮންޓްރޯލްގެ ދަށަށް ގެންދިޔަ އިރު ގިނަ އަދަދެއްގެ ބަޔަކު އެޗެނަލަށް ސަބްސްކްރައިބްކޮށް ޚިދުމަތް ހޯދަމުން ދިޔަ ކަމަށެވެ.

އޭނާ ވިދާޅުވީ، އެޗެނަލްތައް އުފައްދާފައި ވަނީ 2023 ވަނަ އަހަރުގެ އޭޕްރީމަހުގެ ތެރޭގައި ކަމަށާއި، އެ ޗެނަލްގެ ހަރަކާތްތައް އެންމެ މަތިވެފައި ވަނީ ފާއިތުވި 2 މަސްދުވަހުގައި ކަމަށެވެ.

ފުލުހުންގެ ބެލުމުގެ ދަށަށް ގެންދިޔަ ޓެލެގްރާމް ޗެނަލްތައް:

- ޖަޒީރާ އެޑްމިން

- ޖަޒީރާ ގާލްސް

- ޖަޒީރާ އެސްކޯޓް ގެލަރީ

- ޖަޒީރާ ސްކޭމް އެލާރޓް

- ޖަޒީރާ ލިންކް ޚަބަރު؛ ހިމެނެއެވެ.

ސައިބަރ ޕޮލިސިންގ ސެންޓަރުގެ އިންވެސްޓިގޭޝަން އޮފިސަރ އިންސްޕެކްޓަރ އޮފް ޕޮލިސް އާމިނަތު މުޙައްމަދު ވިދާޅުވީ، އެޗެނަލްތަކަށް ސަބްސްކްރައިބްކޮށްފައިވާ މީހުންގެ ތެރޭގައި، ދިވެހިންނާއި ބިދޭސީންވެސް ހިމެނޭ ކަމަށެވެ.

އަދި އެމައްސަލައިގައި ހައްޔަރުކުރި، އުމުރުން 28 އަހަރުގެ ފިރިހެން މީހާ އާއި 39 އަހަރުގެ އަންހެން މީހާގެ ބަންދުގެ މުއްދަތު ޖަހާފައިވާކަމުަގއިވެސް އޭނާ ވިދާޅުވިއެވެ.

ހައްޔަރުކޮށްފައިވާ ދެމީހުންނާއި އަދި އެކަމުގައި ޝާމިލްވާ މީހުންގެ އެކައުންޓްތަކުގައި އެތައް މިލިޔަން ރުފިޔާއެއް ދައުރުކޮށްފައިވާކަންވެސް ފުުލުހުން ވަނީ ފާހަގަކޮށްފައެވެ.

މި ޗެނަލްތައް މެދުވެރިކޮށް ހަށިވިއްކުމުގެ ވިޔަފާރި ހިންގަމުން ގެންގޮސްފައި ވަނީ، ރާއްޖެއިން ބޭރުންވެސް ހަށިވިއްކާ މީހުން ގެނެސްގެން ކަމަށާއި، އަދި އެކަމުގައި ދިވެހިންވެސް ޝާމިލްވެފައިވާކަން ތަޙްޤީޤަށް ސާބިތުކުރެވިފައިވާ ކަމުގައި އާމިނަތު މުޙައްމަު ވިދާޅުވިއެވެ. އޭގެ އިތުރުން އެވިޔަފާރީ ފުޅާކޮށް ހިންގުމަށްޓަކައި ޚާއްޞަކޮށްގެން ޓެކްސީއެއް ބޭނުން ކުރަމުން ގެންގޮސްފައިވާ ކަމުގައިވެސް އޭނާ ވިދާޅުވިއެވެ.