އިންގްލިޝް ޕްރިމިއަލީގުގައި ހޮނިހިރު ދުވަހުގެރޭ ފުލަމް އަތުން 3-0 އިން ޓޮޓެންހަމް ހޮޓްސްޕާ ބަލިވި ބަލިވުމަކީ ގަބޫލުކުރަން ދަތި ބައްޔެއްކަމަށް، ޓޮޓެންހަމްގެ ކެޕްޓަން ހިއުން-މިން ސޮން ބުނެފިއެވެ.

ފުލަމްގެ ކްރޭވަން ކޮޓޭޖުގައި ކުޅުނު މި މެޗުގައި ޓޯޓެންހަމް ފެނުނީ ފުލަމްއަށް ވުރެން ހުރިހާ ގޮތަކުން ވެސް ބަލިކަށި ޓީމެއްގެ ގޮތުގައެވެ. މި ސީޒަންގައި 14 ގޯލު ކާމިޔާބުކޮށްފައިވާ ސޮންއަށް ވެސް މި މެޗުގައި އެދެވޭ ކުޅުމެއް ދެއްކިފައެއް ނުވެއެވެ.

މި މެޗުގައި ފުލަމްއިން އެ ޓީމުގެ ފުރަތަމަ ގޯލު ކާމިޔާބުކުރީ ފުރަތަމަ ހާފުގެ 42 ވަނަ މިނެޓުގައި އެ ޓީމުގެ ފޯވާޑް، ރޮޑްރީގޯ މުނީޒެވެ. ދެވަނަ ގޯލު ކާމިޔާބުކުރީ ދެވަނަ ހާފުގެ 4 ވަނަ މިނެޓުގައި ލުޗިކްއެވެ. އަދި އެ ޓީމުގެ 3 ވަނަ ގޯލު މެޗުގެ 61 ވަނަ މިނެޓުގައި ކާމިޔާބުކުރީ ފުރަތަމަ ގޯލު ވެސް ކާމިޔާބުކުރި މުނީޒެވެ.

މެޗަށްފަހު ސްކައި ސްޕޯޓްސްއަށް ދިން އިންޓަވިއުއެއްގައި ޓޮޓެންހަމްގެ ސޮން ބުނީ، މިއީ މި ސީޒަނުގައި އެ ޓީމުން ކުޅުނު އެންމެ ދަށް މެޗު ކަމުގައެވެ. އަދި މިއީ އެންމެން ވެސް، އެމީހަކަށް މި މެޗުގައި ހެދުނު ގޯސްތައް ގަބޫލުކުރަން ޖެހޭ ވަގުތު ކަމަށެވެ.

ގޯލެއް ކާމިޔާބު ނުކުރެވި 3 ގޯލުގެ ތަފާތުން ޓޮޓެންހަމް މި ބަލިވީ ވަރަށް ގިނަ ދުވަސްތަކަކަށް ފަހުއެވެ. އެ ޓީމު އެންމެ ފަހުން 3-0 އިން ބަލިވެފައިވަނީ 2021 އޮކްޓޯބަރުގައި އޮލެ ގުނަ ޝޯލްޝާގެ މެންޗެސްޓާ ޔުނައިޓެޑު އަތުންނެވެ.