މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި ވޯޓުލުމަށް ރީރެޖިސްޓްރީ ވުމަށް ހުޅުވާލި ފުރުޞަތުގައި، 11000 ވުރެ ގިނަ މީހުން ރެޖިސްޓްރީ ކޮށްފައިވާ ކަމުގައި އިލެކްޝަންސް ކޮމިޝަނުން ހާމަކޮށްފިއެވެ.

އެކޮމިޝަނުން ހާމަކޮށްފައިވާ ގޮތުގައި ރީ-ރެޖިސްޓްރީ ކުރުމަށް ދީފައިވާ މުއްދަތު ހޮނިހިރު ދުވަހުގެ 3:00އަށް ހަމަވިއިރު، ޖުމުލަ 11،169 މީހުން ވަނީ ރީ- ރެޖިސްޓްރޭޝަނަށް ހުށައަޅާފައެވެ. މިގޮތުން ހުށައަޅާފައިވާ ފޯމުތަކުގެ ތެރެއިން 10،028 ފޯމްގެ ސައްޙަކަން ކަށަވަރުކޮށް އެމީހުން ވަނީ ރީރެޖިސްޓްރީކޮށްދެވިފައި ކަމުގައިވެސް އިލެކްޝަންސް ކޮމިޝަނުން ހާމަކޮށްފައިވެއެވެ.

ރީރެޖިސްޓްރީ ކުރުމަށް ހުޅުވާލި ފުރުޞަތުގައި ރާއްޖެއިން ބޭރުގައި ވޯޓުލުމަށް ރީރެޖިސްޓްރީ ކުރި އަދަދުތަކަށް ބަލާއިރު، ވޯޓު ފޮށި ބެހެއްޓޭނީ 3 ޤައުމެއްގައި ކަމަށްވެސް އިލެކްޝަންސް ކޮމިޝަނުން ވަނީ ހާމަކޮށްފައެވެ.

މިއަހަރުގެ ރައްޔިތުންގެ މަޖިލީހުގެ އިންތިޚާބުގެ ވޯޓުލުން ބޭއްވުމަށް ހަމަޖައްސާފައި ވަނީ 21 އޭޕްރީލް 2024ވާ އާދީއްތަ ދުވަހުގައެވެ. މިފަހަރުގެ އިންތިޚާބުގައި ރައްޔިތުންގެ މަޖިލީހުގެ 93 ދާއިރާއަކަށް މެމްބަރުން އިންތިޚާބު ކުރާނެއެވެ.